Një mjet i ri inteligjence artificiale, i krijuar nga studiuesit e Universitetit të Stanfordit, mund të zvogëlojë me 60% përpjekjet e kota për transplant organesh, veçanërisht të mëlçisë. Aktualisht mijëra pacientë në mbarë botën presin një organ të ri, por numri i donatorëve është shumë më i ulët se kërkesa.
Në transplantet e mëlçisë, shumë spitale përdorin edhe donatorë që ndalojnë aktivitetin kardiak. Por shpesh këto transplante anulohen, sepse pacienti dhurues nuk ndërron jetë brenda 45 minutave pasi hiqet nga aparati i oksigjenimit. Nëse kalon ky afat, mëlçia nuk është më e sigurt për përdorim dhe procedura ndërpritet.
Mjeti i ri i AI-së parashikon me saktësi nëse dhuruesi do të vdesë brenda kohës së nevojshme që organi të mbetet i vlefshëm. Sipas studimit, ai rezultoi më i saktë se edhe kirurgët më të specializuar, duke ulur ndjeshëm rastet ku përgatiten transplante që në fund anulohen.
Lexo edhe: Ndryshim i rëndësishëm nga BE-ja: Të gjitha veturat duhet të kenë të ndezura edhe dritat e pasme!
Sipas Dr. Kazunari Sasaki, ky model mund të bëjë të gjithë procesin shumë më efikas dhe të rrisë numrin e pacientëve që mund të marrin organin që u shpëton jetën. Studimi është publikuar në revistën shkencore Lancet Digital Health.
AI-ja është trajnuar me të dhëna nga më shumë se 2,000 dhurues në SHBA dhe përdor informacione neurologjike, respiratore dhe kardiake për të parashikuar me saktësi momentin e vdekjes së dhuruesit. Kjo do të thotë më pak humbje kohe, më pak kosto dhe më shumë jetë të shpëtuara.
