Mjekësia 3D, si po ndryshon ky startup norvegjez kirurgjinë moderne

A mund ta bëjnë organet virtuale kirurgjinë me rrezik të lartë më të sigurt? Teknologjitë e reja u japin kirurgëve mundësinë të eksplorojnë modele tredimensionale të organeve të pacientëve përmes syzeve VR, duke “prerë” në model me mjete virtuale përpara se të fillojë ndërhyrja reale.

Kirurgët mund të jenë së shpejti në gjendje të kryejnë operacione komplekse pa prekur pacientin. Një nënë që dhuron një pjesë të mëlçisë për foshnjën e saj të sëmurë, për shembull, mund t’i nënshtrohet një procedure më të parashikueshme, sepse mjekët do ta kenë studiuar paraprakisht organin në 3D, duke e rrotulluar, ndarë dhe analizuar në detaje.

Një startup norvegjez beson se kjo qasje nuk është më fantashkencë, por një element që po bëhet pjesë e praktikës moderne mjekësore.

Holocare po zhvillon një teknologji të realitetit virtual që i lejon kirurgët të shohin organin e pacientit si hologram 3D, të krijuar nga të njëjtat skanime MRI ose CT që përdoren zakonisht në spitale.

Në vend të imazheve të sheshta dhe gri, mjekët mund të hyjnë brenda një rikonstruksioni virtual dhe të planifikojnë së bashku çdo hap të operacionit.

Sipas Alison Sundset, drejtoresha ekzekutive e Holocare, kjo teknologji u jep ekipeve kirurgjikale një mjedis të përbashkët ku mund të diskutojnë rastet komplekse duke parë të njëjtat struktura në mënyrë të përbashkët dhe pa interpretime të ndryshme personale.

Sistemi përdor inteligjencën artificiale për të shndërruar imazhet 2D në modele të detajuara 3D. Kirurgët i eksplorojnë ato me syze VR, duke rritur detaje të organit, duke e rrotulluar dhe madje duke “prerë” në model me mjete virtuale.

Gjatë një demonstrimi, dizajnerët e produktit të kompanisë simulonin një ndërhyrje në mëlçinë e një pacienti me metastaza kolorektale, duke testuar mënyrën e heqjes së tumorit dhe duke llogaritur sa pjesë e shëndetshme e mëlçisë do të mbetej. Sipas Dag Otto Lund, drejtues i dizajnit në Holocare, vlera kryesore që vlerësojnë klinicistët është ndjesia hapësinore dhe kuptimi më i saktë i strukturave anatomike, të cilat shpesh është e vështirë t’i interpretojnë nga imazhet e sheshta.

Teknologjia është autorizuar për përdorim në rastet e mëlçisë, ndërsa përdorime për organe të tjera pritet të miratohen së shpejti. Spitale në Norvegji, Gjermani, Francë, Spanjë dhe Mbretërinë e Bashkuar e përdorin tashmë platformën.

Një shans i dytë për pacientët

Tradicionalisht, kirurgët e kanë përkthyer skanimet e sheshta në modele tredimensionale në mendjen e tyre; një aftësi që kërkon vite përvojë dhe shpesh çon në interpretime të ndryshme mes anëtarëve të ekipit.

Sundset thotë se teknologjia ka ndikuar realisht në vendimmarrjen klinike. Ajo përmend një rast ku një ndërhyrje ishte konsideruar e pamundur, por pas rishikimit të organit në 3D, kirurgu e rifut në procedurë dhe pacienti sot është në gjendje të mirë shëndetësore.

Sistemi i Holocare, i bazuar në shfletues, gjeneron modelin 3D brenda rreth dhjetë minutash dhe u lejon kirurgëve të ngarkojnë drejtpërdrejt imazhet, duke ulur varësinë nga radiologët. Megjithatë, kompania thekson se ky software nuk është mjet diagnostik dhe cilësia e modelit varet nga cilësia e imazheve hyrëse.

Holocare po punon për sjelljen e udhëzimit holografik në kohë reale brenda sallës së operacionit, përmes një roboti kirurgjikal. Qëllimi përfundimtar është që kirurgu të punojë duke parë mbi trupin e pacientit një hologram të përputhur me anatominë reale, duke kryer operimin në një pamje të plotë 3D.