Illyrian TSX: Supermakina shqiptare që synon të trondisë botën e teknologjisë automobilistike në 2026

Biznesmeni Arbër Çepani dhe avokati Egli Haxhiraj kanë bërë të ditur një nga lajmet më të rëndësishme teknologjike për Shqipërinë: nisjen e projektit për prodhimin e supermakinës “Illyrian TSX”, një model ultra-performant që pritet të prekë asfaltin në maj të vitit 2026.

Marrëveshja e investimit është firmosur me Qëndrim Thaqin, themeluesin e “Arrera Automobili”, i njohur për krijimin e disa prej makinave më të shtrenjta dhe më të avancuara në botë. Nga Torino e Italisë, zemra historike e industrisë automobilistike, tre shqiptarë synojnë t’i prezantojnë botës një makinë që sfidon kufijtë e inxhinierisë moderne.

Çepani dhe Haxhiraj theksuan se ky projekt është më shumë se një investim—është një ëndërr që sfidon realitetin. “Ëndrrat duhet të jenë më të mëdha se imagjinata,” shprehen ata, duke theksuar se Illyrian TSX pritet të kombinojë teknologjitë më të avancuara të motorit, materialet ultra të lehta dhe një dizajn agresiv që do të përfaqësojë me krenari markën “Made in Albania”.

Lexo edhe: Makina më e shtrenjtë e shitur ndonjëherë në ankand nuk ishte as Bugatti e as Ferrari

Sipas tyre, zhurma e marmitës së kësaj supermakine do të “shurdhojë botën në 2026”, ndërsa projekti synon të bëjë krenar çdo shqiptar anembanë globit dhe të vendosë Shqipërinë në garë me gjigantët më të mëdhenj të automobilizmit botëror.