Sipas raportit, në vitin 2025 sistemet e AI mund të prodhojnë nga 32 deri në 80 milionë tonë dioksid karboni (CO₂), një nivel i ngjashëm me ndotjen vjetore të një qyteti të madh si New York-u ose të një shteti të vogël europian.
Studimi thekson se këto shifra janë të krahasueshme me emetimet e Norvegjisë apo New York-ut në vitet e fundit. Qendrat e të dhënave janë ndërtesa të mëdha që strehojnë serverë për shërbime online, si cloud, video dhe AI, dhe ato kërkojnë shumë energji për të funksionuar.
Përveç ndotjes, këto qendra konsumojnë edhe sasi shumë të mëdha uji për ftohjen e serverëve. Sipas raportit, përdorimi i ujit nga AI në vitin 2025 mund të arrijë nivele të ngjashme me konsumin vjetor global të ujit të ambalazhuar në shishe. Një pjesë e madhe e këtij uji përdoret në mënyrë indirekte për prodhimin e energjisë elektrike.
Megjithatë, matja e saktë e këtij ndikimi është e vështirë, pasi shumë kompani teknologjike nuk publikojnë të dhëna të plota për konsumin e energjisë dhe ujit. Studimi tregon se përdorimi indirekt i ujit mund të jetë deri në katër herë më i lartë se ai direkt.
Raporti vëren se Europa ka një avantazh krahasuar me pjesën tjetër të botës, pasi energjia elektrike këtu është më e pastër. Rreth 15% e qendrave globale të të dhënave ndodhen në Europë, dhe rrjetet energjetike europiane prodhojnë më pak CO₂ për njësi energjie, duke ulur kështu ndikimin mjedisor të këtyre qendrave.
