Një zhvillues nga Kanadaja ka krijuar një aplikacion interesant që e kthen trackpad-in e MacBook-ut në një peshore. Aplikacioni quhet TrackWeight dhe tregon se sa peshë ka një objekt i vendosur mbi trackpad. Edhe pse tingëllon bukur, kjo nuk është diçka praktike për përdorim të përditshëm.
Për ta përdorur, duhet të mbani lehtë një gisht mbi trackpad, sepse ai nuk funksionon pa kontakt. Gishti duhet të jetë sa për ta aktivizuar, pa ushtruar presion. Më pas, vendosni objektin mbi trackpad dhe aplikacioni tregon peshën. Mund të shtypni edhe tastin “space” për ta zeruar peshën.
Testet tregojnë se rezultatet janë relativisht të sakta. Për shembull, një tas me boronica u mat vetëm disa gramë ndryshe nga një peshore kuzhine. Aplikacioni funksionon edhe me Magic Trackpad, ndoshta pak më praktik, por sërish jo shumë i sigurt për përdorim real.
Arsyeja pse kjo funksionon është se trackpad-i i Mac-ut ka sensor presioni, i cili përdoret për funksione si Force Touch. Ky sensor mat sa fort po shtypni mbi sipërfaqe dhe aplikacioni e shfrytëzon këtë informacion për të llogaritur peshën.
Megjithatë, përdorimi i një laptopi si peshore nuk rekomandohet, sidomos në kuzhinë, pasi rrezikoni ta dëmtoni pajisjen. TrackWeight mbetet më shumë një eksperiment argëtues dhe një shembull interesant i teknologjisë së fshehur që kanë laptopët modernë.
