Industria e robotikës po zhvillohet me ritme të shpejta dhe bashkë me të po shfaqen edhe role të reja pune. Një nga më të pazakontat? Një punonjës njerëzor që kalon gjithë ditën duke mbikëqyrur një robot në punë.
Sipas një raportimi të publikuar nga The Wall Street Journal, një robot humanoid i quajtur Digit është vendosur të punojë në linjën e prodhimit të një fabrike në Karolinën e Jugut, SHBA. Roboti punon deri në tetë orë në ditë në fabrikën Schaeffler në qytetin Cheraw, duke operuar një makineri për shtypjen e pjesëve metalike.
Por për momentin roboti nuk punon i vetëm. Ai është vendosur brenda një kabine të mbyllur me xham mbrojtës (plexiglass), ndërsa një punonjës njerëzor qëndron aty pranë gjatë gjithë kohës për ta mbikëqyrur. Arsyeja është e thjeshtë: roboti ende nuk është në gjendje të dallojë njerëzit që mund të ndodhen në ambientin përreth. Për këtë shkak, rregullat e sigurisë industriale kërkojnë që ai të qëndrojë i izoluar nga punonjësit. Megjithatë, ekspertët presin që deri në fund të vitit robotët të jenë në gjendje të identifikojnë njerëzit dhe të punojnë pranë tyre pa barriera fizike. Courtney Baines, inxhiniere për teknologjinë e avancuar të prodhimit në kompaninë Schaeffler, shpjegon se kompania po studion shumë detyra të tjera ku robotët humanoidë mund të përdoren në të ardhmen.
Por kjo situatë ngre edhe një pyetje të madhe: çfarë do të ndodhë me punët e njerëzve? Kompania Agility Robotics, që prodhon robotin Digit, ka deklaruar se aktualisht përdorimi i robotit në fabrika kushton rreth 10 deri në 25 dollarë në orë, në varësi të mënyrës se si përdoret në prodhim. Synimi i kompanisë është që në të ardhmen ta ulë këtë kosto në vetëm 2 deri në 3 dollarë në orë.Për krahasim, punët fillestare në fabrikën Schaeffler paguhen rreth 20 dollarë në orë. Nëse robotët bëhen më të lirë se punonjësit njerëzorë, është e lehtë të kuptohet se cilin opsion mund të zgjedhin kompanitë që kërkojnë të ulin kostot.
“Efikasiteti është gjithçka në këtë industri dhe presioni për të qenë sa më produktiv nuk ndalet kurrë,” thotë Doug Thompson, një punonjës me 14 vite përvojë në fabrikën Schaeffler. Zhvillime të ngjashme po ndodhin edhe në vende të tjera. Së fundmi u raportua se një kompani kineze ka vendosur dy robotë humanoidë në fabrikën e saj të makinave elektrike në Pekin. Edhe ata punojnë të izoluar në kabina mbrojtëse, por duke parë ritmin e zhvillimit të teknologjisë, ekspertët besojnë se së shpejti robotët mund të punojnë krah për krah me njerëzit në linjat e prodhimit.
Në një kohë kur automatizimi po përparon me shpejtësi, pyetja që mbetet është: a do të bashkëpunojnë njerëzit dhe robotët në të ardhmen, apo robotët do t’i zëvendësojnë gradualisht njerëzit në shumë prej këtyre punëve?
