Qindra familje në France kanë ngritur një padi kolektive kundër TikTok, duke e akuzuar platformën për “abuzim me dobësinë” e të miturve dhe ndikim të rëndë në shëndetin mendor të adoleshentëve.
Sipas raportimit të Franceinfo, padia është dorëzuar në Zyrën e Prokurorit të Parisit dhe përfaqësohet nga avokatja Laure Boutron-Marmion.
Familjet pretendojnë se algoritmi i TikTok-ut shfrytëzon cenueshmërinë emocionale të të rinjve, duke kontribuar në raste depresioni, anoreksie, mendimesh vetëvrasëse dhe, në disa raste tragjike, edhe vetëvrasje.
“TikTok krijon burgje mendore për adoleshentët, burgje ankthi”, deklaroi Boutron-Marmion për Franceinfo.
Sipas saj, platforma përdor një sistem rekomandimesh tepër të personalizuara dhe një fluks të pandërprerë videosh që krijon varësi të fortë psikologjike tek përdoruesit e rinj.
Avokatja akuzon drejtuesit e TikTok-ut, si në Francë ashtu edhe në nivel ndërkombëtar, se janë plotësisht të vetëdijshëm për efektet që algoritmi i tyre mund të ketë tek adoleshentët, por nuk marrin masa të mjaftueshme për t’i parandaluar ato.
Lexo edhe: Personaliteti juaj mund të “lexohet” nga historiku i bisedave me AI
Padia synon ta çojë kompaninë përpara drejtësisë penale franceze për “abuzim me dobësinë”, përveç proceseve civile që tashmë janë në zhvillim.
Disa prej familjeve të përfshira në proces kanë humbur fëmijët e tyre nga vetëvrasja, ndërsa të tjera raportojnë pasoja serioze psikologjike tek adoleshentët.
Çështja ka rindezur debatin në Francë për rregullimin më të fortë të rrjeteve sociale dhe vendosjen e kufizimeve për përdoruesit e mitur. Një nga propozimet që po diskutohet aktualisht është ndalimi i përdorimit të mediave sociale për fëmijët nën 15 vjeç.
Nga ana tjetër, TikTok ka deklaruar më herët se ka implementuar mbi 50 mjete dhe funksione sigurie për adoleshentët dhe se vazhdon të investojë në përvoja më të sigurta dhe të përshtatura sipas moshës së përdoruesve.
