Qeveria britanike ka njoftuar se do të ndalojë përdorimin e rrjeteve sociale për fëmijët nën moshën 16 vjeç, në një lëvizje që synon të forcojë sigurinë online të të rinjve dhe të adresojë ndikimin që platformat digjitale kanë në shëndetin e tyre mendor.
Kryeministri britanik, Keir Starmer, deklaroi se vendi do të ndërmarrë masa më të forta se çdo shtet tjetër deri më sot për të kufizuar aksesin e fëmijëve në rrjetet sociale, me synimin për t’u “rikthyer fëmijërinë”.
Ndalimi pritet të prekë platforma të njohura si Snapchat, TikTok, YouTube, Instagram, Facebook dhe X. Paketa e parë e rregullave mund të hyjë në fuqi që në pranverën e vitit 2027.
Lexo edhe: Kanadaja me ligj ndalon rrjetet sociale për personat nën moshën 16-vjeçare
Britania planifikon të mbështetet te modeli australian, i cili vitin e kaluar miratoi një nga legjislacionet më të forta në botë për kufizimin e përdorimit të rrjeteve sociale nga të miturit. Megjithatë, Londra synon të shkojë edhe më tej, duke vendosur kufizime shtesë për funksionalitete që konsiderohen veçanërisht të rrezikshme për fëmijët.
Ndër masat që po shqyrtohen janë bllokimi i transmetimeve live (livestreaming) dhe i komunikimit me persona të panjohur për përdoruesit nën 16 vjeç. Për adoleshentët 16 dhe 17 vjeç, këto mbrojtje do të aktivizohen automatikisht si cilësime standarde. Qeveria po vlerëson gjithashtu mundësinë e vendosjes së kufizimeve gjatë orëve të natës dhe masa për të reduktuar mekanizma si “infinite scrolling”, të cilët i mbajnë përdoruesit të angazhuar për periudha të gjata kohe.
“Sot po shkojmë më larg se çdo vend tjetër në botë duke ndaluar rrjetet sociale për të rinjtë nën 16 vjeç dhe duke vendosur mbrojtje më të gjera për t’u rikthyer fëmijërinë,” deklaroi Starmer.
Gjatë një konference për shtyp, ai argumentoi se rrjetet sociale po ndikojnë negativisht në mirëqenien e fëmijëve dhe se shumë prej tyre janë projektuar për të krijuar varësi. Sipas tij, vendimi nuk është marrë lehtë, por është i domosdoshëm për të mbrojtur brezat e rinj nga efektet e dëmshme të përdorimit të pakontrolluar të teknologjisë.
Nisma britanike vjen në një kohë kur qeveritë në mbarë botën po përballen me presion në rritje për të rregulluar ndikimin e platformave digjitale mbi të miturit, ndërsa debati mbi balancën mes sigurisë, privatësisë dhe lirisë së përdorimit të internetit po bëhet gjithnjë e më i fortë.
