Meta Glasses, trendi shqetësues në shkolla: adoleshentët po i përdorin për të filmuar dhe ngacmuar vajzat

Një trend shqetësues po shfaqet në shkollat e mesme dhe të ciklit të ulët në SHBA, ku disa adoleshentë po përdorin syzet inteligjente të Meta-s për të filmuar fshehurazi bashkëmoshatarët dhe për t’i publikuar më pas videot në TikTok dhe Instagram. Në disa raste, djemtë i përdorin syzet për të imituar videot “POV” të krijuesve të përmbajtjes që ngacmojnë njerëz në ambiente publike, duke iu kërkuar vajzave informacione personale ose llogaritë e tyre në rrjetet sociale, ndërsa ato përpiqen të largohen.

Një shqyrtim i kryer nga Futurism ka evidentuar një numër të madh videosh të regjistruara në korridore, klasa dhe ambiente të shkollave, kryesisht me syzet AI të Meta-s, të zhvilluara në bashkëpunim me Ray-Ban. Në disa prej tyre shfaqen nxënës, mësues dhe pjesëtarë të stafit që nuk duket se e dinë se po filmohen. Në raste të tjera, personat e kuptojnë se po regjistrohen dhe shprehin qartë shqetësimin ose kundërshtimin e tyre.

Lexo edhe: 12 pajisjet inteligjente që do t’ju ndryshojnë mënyrën se si pushoni këtë verë

Përveç videove të zakonshme të tipit “Day in My Life”, syzet po përdoren edhe për të regjistruar debate me mësuesit, konflikte mes nxënësve dhe situata që më pas publikohen për të marrë shikime dhe reagime. Madje, disa nxënës janë filmuar duke përdorur syzet në klasa edhe kur shkollat kanë rregulla që kufizojnë përdorimin e telefonave dhe pajisjeve elektronike gjatë mësimit.

Rasti ka ngritur shqetësime të veçanta për privatësinë dhe bullizmin, pasi bëhet fjalë për të mitur që mund të filmojnë dhe publikojnë bashkëmoshatarë pa pëlqimin e tyre. Ekspertët dhe kritikët paralajmërojnë se sjellje të tilla mund të ndikojnë edhe në mënyrën se si të rinjtë e perceptojnë kufirin mes krijimit të përmbajtjes dhe cenimit të privatësisë së të tjerëve. Fenomeni duket se po ndjek modelin e videove virale të “pickup artists” dhe prankster-ëve, por këtë herë sjellja po zhvendoset brenda mjediseve shkollore dhe po prek drejtpërdrejt të miturit.