Frigoriferët modernë nuk mjaftohen më vetëm me ruajtjen e ushqimeve. Ekrane, lidhje me internetin dhe funksione të inteligjencës artificiale po bëhen pjesë e pajisjeve shtëpiake premium. Por pikërisht varësia nga softueri duket se u ka krijuar një problem serioz disa pronarëve të frigoriferëve Samsung Bespoke AI 4-Door në Korenë e Jugut.
Sipas Star News Korea, disa pajisje me vlerë afro 4,000 dollarë pësuan probleme pas instalimit të një përditësimi të firmware-it. Ekrani i brendshëm shfaqte një mesazh gabimi për orë të tëra dhe, sipas raportimeve të përdoruesve, problemi nuk zgjidhej as pasi frigoriferi shkëputej nga energjia dhe rindizej.
Situata u bë edhe më problematike sepse defekti ndodhi pak përpara Chuseok, një prej festave më të rëndësishme tradicionale në Korenë e Jugut. Disa përdorues raportuan se u detyruan të hidhnin ushqime të përgatitura ose të ruajtura posaçërisht për festën.
Sipas raportimit, disa klientëve iu tha se data më e hershme për ndërhyrjen e shërbimit teknik ishte 1 tetori, pra pas përfundimit të festimeve.
Lexo edhe: 10 ushqimet që mund t’ju helmojnë në verë nëse nuk ruhen në frigorifer
Kur frigoriferi varet nga një përditësim software
Rasti nxjerr në pah një problem gjithnjë e më të dukshëm të pajisjeve “smart”: sa më shumë funksione të kontrollohen nga softueri, aq më shumë një pajisje tradicionale mund të ndikohet nga një gabim dixhital.
Samsung promovon frigoriferët e saj inteligjentë me funksione që mund të ndihmojnë në identifikimin e ushqimeve, sugjerimin e recetave, menaxhimin e produkteve dhe përdorimin e përmbajtjeve multimediale. Ideja është që frigoriferi të shndërrohet nga një pajisje e thjeshtë në një qendër inteligjente të kuzhinës.
Por incidenti në Korenë e Jugut ngre një pyetje më të gjerë: a duhet që funksioni bazë i një pajisjeje kaq të rëndësishme të mund të ndikohet nga një përditësim softueri?
Dhe frigoriferët nuk janë të vetmit. Vitet e fundit janë prezantuar furça dhëmbësh me AI, pajisje inteligjente kuzhine, zile dere me njohje të fytyrës dhe një numër gjithnjë e më i madh produktesh të përditshme që lidhen me internetin dhe përdorin algoritme.
Teknologjia mund t’i bëjë pajisjet më të dobishme, por rasti i frigoriferëve Samsung tregon edhe anën tjetër të medaljes: kur një pajisje që dikur kishte vetëm një detyrë të thjeshtë bëhet një kompjuter i lidhur me internetin, edhe një gabim në software mund të kthehet në një problem shumë real në shtëpi.
