Studiuesit nga Instituti Qualcomm në Universitetin e Kalifornisë kanë krahasuar përgjigjet e shkruara nga mjekët, me ato të shkruara nga ChatGPT. Përgjigjet lidheshin me pyetje shëndetësore të marra nga pacientë realë, për të analizuar rolin që mund të luajnë asistentët AI në kujdesin shëndetësor.
Studimi mori në mënyrë rastësore 195 shkëmbime nga AskDocs të Reddit, ku mjekë të verifikuar iu përgjigjen pyetjeve publike. Një panel prej tre profesionistësh të licencuar të kujdesit shëndetësor vlerësoi çdo pyetje me përgjigjet përkatëse, dhe u pa nëse përgjigja e kishte origjinën nga një mjek ose ChatGPT.
Ata krahasuan përgjigjet bazuar në cilësinë e informacionit dhe ndjeshmërinë ndaj pacientit, duke vënë në dukje se cilën prej tyre preferonin. Paneli i vlerësuesve profesionistë të kujdesit shëndetësor preferoi përgjigjet e ChatGPT ndaj përgjigjeve të mjekëve në 79% të rasteve. Për më tepër, përgjigjet e ChatGPT u vlerësuan dukshëm më mirë në cilësi sesa përgjigjet e mjekëve: përgjigjet me cilësi të mirë ose shumë të mirë ishin 3.6 herë më të larta për ChatGPT sesa mjekët (mjekët 22.1% kundrejt ChatGPT 78.5%).
Përgjigjet ishin gjithashtu më empatike, dhe sipas studimit përgjigjet empatike ose shumë empatike ishin 9.8 herë më të larta për ChatGPT sesa për mjekët (mjekët 4.6% kundrejt ChatGPT 45.1%). Përgjigjet e ChatGPT adresonin më shumë aspekte të pyetjeve të pacientit sesa përgjigjet e mjekëve.
Profesionistët e kujdesit shëndetësor besojnë se ChatGPT, kur përdoret së bashku me mjekët, mund të ofrojë kujdes më të mirë dhe më empatik, duke përmirësuar përfundimisht ofrimin e kujdesit shëndetësor. Studimi është i pari që tregon se si asistentët e AI mund të zgjidhin potencialisht problemet e ofrimit të kujdesit shëndetësor, dhe sugjeron që ChatGPT mund të hartojë në mënyrë efikase këshilla mjekësore me cilësi të lartë dhe të personalizuar për shqyrtim nga mjekët, gjë që do të transformojë mënyrën se si mjekët mbështesin pacientët e tyre.
Studimi arrin në përfundimin se integrimi i asistentëve AI në mesazhet e kujdesit shëndetësor duhet të bëhet pasi të jetë analizuar në mënyrë të kujdesshme, për të vlerësuar se si përdorimi i asistentëve të AI ndikon në rezultatet si për mjekët ashtu edhe për pacientët.
