Të moshuarit që përdorin internetin rregullisht, mund të kenë më pak gjasa të zhvillojnë demencë, sipas një studimi të ri të botuar në Journal of the American Geriatrics Society. Studimi analizoi 18,154 të rritur, midis 50 dhe 65 vjeç, të cilët nuk kishin demencë në fillim të studimit, duke ndjekur përdorimin e internetit nga to gjatë tetë viteve.
Pjesëmarrësit që përdornin internetin rregullisht që në fillim të studimit kishin rreth gjysmën e rrezikut të zhvillimit të demencës, në krahasim me ata që nuk ishin përdorues të rregullt. Ata që përdornin internetin për dy ose më pak orë në ditë kishin rrezikun më të ulët të demencës. Ndërsa ata që qendronin në internet për gjashtë deri në tetë orë në ditë kishin një rrezik më të lartë të demencës.
Studiuesit sugjerojnë se angazhimi në internet mund të ndihmojë në zhvillimin dhe ruajtjen e aftesisë njohëse, e cila mund të kompensojë plakjen e trurit dhe të zvogëlojë rrezikun e demencës. Megjithëse studimi nuk analizoi atë që pjesëmarrësit po bënin në internet, disa studime sugjerojnë se stimulimi intelektual mund të ndihmojë edhe më shumë në parandalimin e demencës.
Rreth 6.2 milionë njerëz mbi 65 vjeç kanë sëmundjen e Alzheimerit, e cila është forma më e zakonshme e demencës. Qendrat e SHBA për Kontrollin dhe Parandalimin e Sëmundjeve parashikojnë që ky numër të rritet në mënyrë eksponenciale me rritjen e moshës së njerëzve. Studimi i ri përmban një gjetje të rëndësishme, pasi identifikon një faktor tjetër potencialisht të modifikueshëm që mund të ndikojë në rrezikun e demencës. Përtej ilaçeve, faktorët e stilit të jetesës si stërvitja, gjumi i mjaftueshëm, mbajtja e një peshe të shëndetshme, mbajtja nën kontroll e presionit të gjakut, menaxhimi i sheqerit në gjak, lënia e duhanit dhe qëndrimi i angazhuar me të tjerët mund të zvogëlojnë rrezikun e demencës.
Shoqata e Alzheimerit po kryen një provë klinike dyvjeçare të quajtur “Studimi i Pointerit” në SHBA, për të identifikuar ndërhyrjet në stilin e jetës që mund të ulin rrezikun e një personi për demencë. Përdorimi i internetit nuk është një nga aktivitetet zyrtare të listuara nga CDC, por studimi i ri shton numrin në rritje të provave që qendrimi aktiv në internet mund të ulë riskun e demencës.
Së fundi, përdorimi i rrjeteve sociale nga të moshuarit mund të përmirësojë marrëdhëniet e tyre me njerëzit e tjerë, dhe të reduktojë izolimin, gjë që disa studime sugjerojnë se lidhet me një rrezik më të lartë të demencës. Studimi nuk gjeti një ndryshim në rrezikun e demencës midis gjinive, niveleve të arsimit, ose përkatësisë etnike midis pjesëmarrësve. Studiuesit besojnë se studimet e ardhshme do të ofrojnë prova të mëtejshme dhe do t’u mundësojnë mjekëve të sugjerojnë hapa të mëtejshëm për të reduktuar këtë problematikë në shumë të moshuar.
