Skandal i rradhës për ByteDance: A është TikTok një aplikacion spiun?

Kompania kineze ByteDance, kompania mëmë e TikTok, është kritikuar mbi akuzat për dhënien e aksesit të Partisë Komuniste Kineze (CCP) në të dhënat e aktivistëve dhe protestuesve për të drejtat civile në Hong Kong, një pretendim që ByteDance e mohon kategorikisht.

Pretendimet u shfaqën në një dëshmi në gjykatën amerikane nga ish-ekzekutivi i ByteDance, Yintao Yu, i cili më tej pretendon se gjigandi i teknologjisë jo vetëm që lehtësoi monitorimin e përdoruesve që postonin “përmbajtje të lidhur me protestat”, por gjithashtu mundësoi aksesin e CCP në të dhënat e përdoruesve të TikTok të SHBA.

Kjo situatë, pjesë e një padie të ngritur nga Yu, ekspozon pretendimin se ByteDance i jep CCP-së aksesin e “superpërdoruesit”, duke i dhënë mundësi për të pasur një sy gjithëpërfshirës në të dhënat e grumbulluara nga kompania. Yu, i cili shërbeu si drejtues i inxhinierisë në ByteDance në SHBA për një vit, deklaron se këta anëtarë të CCP nuk janë punonjës të ByteDance, por janë të vendosur në zyrat e kompanisë në Pekin.

Sipas Yu, anëtarët e CCP përdorën akesin e “superpërdoruesit” në 2018 për të “identifikuar dhe gjetur” aktivistët e të drejtave civile të Hong Kongut dhe mbështetësit e protestave, duke i bërë jehonë frikës së kritikëve të teknologjisë.

Këto akuza të fuqishme vijnë duke pasur parasysh kontekstin e klimës politike të Hong Kongut. Pas Lëvizjes “Umbrella” 2014, e cila kërkoi të drejtën demokratike për të zgjedhur drejtuesin e Hong Kongut, Pekini zbatoi një ligj të rreptë të sigurisë kombëtare që shtypte protestat antiqeveritare dhe kufizonte mosbindjen publike.

ByteDance u është përgjigjur këtyre akuzave me mohim kategorik, duke i quajtur pretendimet si “të pabaza”. Një zëdhënës i kompanisë tha: “Ne planifikojmë të kundërshtojmë me forcë ato që besojmë se janë pretendime të pabaza në këtë ankesë”, duke vënë në dukje më tej qëndrimin e shkurtër të Yu në kompani, dhe punën e tij në aplikacionin Flipagram. ByteDance vë në dyshim momentin e këtyre akuzave, mbi pesë vjet pas largimit të Yu.

Pretendimet e Yu shtojnë dyshimet mbi mënyrën e operimit të TikTok. CEO i TikTok, Shou Zi Chew, kohët e fundit u përball me pyetje në një seancë dëgjimore të Kongresit të SHBA, mbi sigurinë e të dhënave të aplikacionit, praktikat e privatësisë dhe lidhjet e supozuara me Pekinin, një seancë që TikTok e cilësoi si “të jashtëzakonshëm”.

Problematikat duket se po shtohen për TikTok në SHBA, pasi Montana u bë shteti i parë që vendosi një ndalim gjithëpërfshirës në platformën e ndarjes së videove në pronësi kineze, që do të hyjë në fuqi në janar 2024. Ky urdhër ndalon ofrimin e TikTok, por lejon përdoruesit aktualë për të vazhduar përdorimin e tij.

TikTok nuk është tërhequr, duke nisur një padi kundër Montanas, duke pretenduar se ndalimi cenon të drejtat e lirisë së fjalës në SHBA. Montana e kishte ndaluar më parë aplikacionin në pajisjet qeveritare në muajin dhjetor.

TikTok, me një bazë përdoruesish prej rreth 1.6 bilionë, kryesisht popullore mes adoleshentëve dhe përdoruesve në të 20-at e tyre, tani po përballet me një numër sfidash, pasi akuzat e paraqitura nga Yu dhe kritikat nga e gjithë bota vështirësojnë luftën e kompanisë për të ruajtur pozicionin e saj.