Eksperti i IT, Erion Demiri: ‘Nuk është e mundur teknikisht mbyllja totale e TikTok, jam kundër censurës’

Eksperti i njohur i IT, Erion Demiri, ka folur së fundmi në një intervistë për Ora News, duke shprehur qëndrimin e tij kundër mbylljes së platformës TikTok, siç është sugjeruar nga kryeministri Edi Rama në deklaratat e tij të fundit. Demiri thekson se, edhe pse TikTok ka disa praktika që duhen ndryshuar, si monetizimi i transmetimeve live ku individët shpesh ofendojnë njëri-tjetrin, mbyllja e platformës nuk është zgjidhja e problemit themelor. Ai argumenton se duhet të kërkohet një bashkëpunim mes autoriteteve dhe platformës për të rregulluar dhe përmirësuar mënyrat e funksionimit, duke shmangur promovimin e antivlerave.

Lexo edhe: Vrasja e Martin Canit, Rama: Po mendojmë mbylljen totale të “TikTok” dhe “Snapchat”!

Sipas Demirit, çështjet që lidhen me internetin dhe ndikimin e tij tek të rinjtë janë komplekse dhe kërkojnë një qasje të gjithanshme. “Gjithçka që rrethon një fëmijë në internet ka problemet e veta, ndaj nuk mund të mbyllim gjithçka. Është e pamundur teknikisht,” tha ai. Eksperti bëri thirrje për një debat më të gjerë dhe të thelluar mbi këtë çështje, duke theksuar rëndësinë e edukimit të të rinjve dhe ndërgjegjësimit të prindërve për përdorimin e teknologjisë.

Për të dëgjuar mendimin e tij të plotë, ndiqni videon në vijim.

TechNews.al