Eksperti i IT: Ja mënyrat që do të përdoren për të pasur aplikacionin TikTok në Shqipëri

Tomi Kallanxhi, ekspert IT, në studion e News24 në një intervistë me gazetaren Dajlana Sejdia tha se është e pamundur që të bllokohet aplikacioni. Eksperti theksoi se mundësia për të mos arritur mbylljen e TikTok është mbi 97%, ndërsa e konsideroi si show vendimin e kryeministrit.

Në vijim, Kallanxhi tregoi disa nga mënyrat që mund të përdorin qytetarët për të pasur akses në këtë platformë.

Ai tha se mund të blihet një kartë ISIM, e cila të jep mundësinë që të përdorësh kompani jo shqiptare të komunikacionit, pra përdor IP jo nga kompanitë shqiptare.

“Një nga teknologjitë e reja është Starlink, kompania e Elon Musk, që mund të marrësh internetin satelitor, pra e ke të vështirë të gjurmosh”, tha Kallanxhi.

Ai u shpreh se ndoshta Kryeministri do të krijojë një alibi, pasi edhe në SHBA, i është dhënë kohë TikTok, që të shesë aksionet.

“Nëse në SHBA do të mbyllet ai është në të njëjtin linjë me SHBA, por Presidenti Trump është shprehur pro këtij aplikacioni”, tha eksperti.

Ai shtoi se asnjë nga shtetet nuk ka dalë në një vendim për mbyllje, ndërsa në Australi është kufizuar deri në moshën 16 vjeç.

“Ata mund të heqin përdorimin e aplikacionit, por shumica e njerëzve e kanë shkarkuar. Ata mund ta bëjnë për storin e Shqipërisë, por t’i ndryshon storin e vendos Kosova dhe nuk mund të bllokohet.

Lexo edhe: Eksperti i IT, Erion Demiri: ‘Nuk është e mundur teknikisht mbyllja totale e TikTok, jam kundër censurës’

Të duash të ndalosh teknologjinë është njëlloj si të marrësh një puding dhe ta ngulësh në mur me një gozhdë”, tha Kallanxhi.

Ai e paraqiti vendimin si të kryeministrit dhe jo të shqiptarëve.

Në vijim ai bëri edhe një pyetje ironike, duke u shprehur “po personat që do të përdorin TikTok do të arrestohen, përsa kohë përdorimi i tij konsiderohet i paligjshëm për 1 vit?”.

Ai u shpreh se kryeministri do të tërhiqet nga vendimi, ose sipas tij  mund të përdorë mënyrën e Australisë që të kufizojë moshën.