Björn Ulvaeus, anëtar i grupit legjendar ABBA, shprehu shqetësimin e tij në Parlamentin Europian për ndikimin e inteligjencës artificiale (AI) mbi të drejtat e autorit. Ai paralajmëroi se kompanitë e mëdha teknologjike po përpiqen të dobësojnë këto të drejta përmes Kodit të Praktikës për AI që po përgatitet në Bashkimin Europian.
Ulvaeus, që është president i CISAC (një organizatë globale e autorëve dhe kompozitorëve), tha se mbështet teknologjinë, por jo nëse ajo dëmton krijuesit. Ai theksoi se AI nuk duhet të ndërtohet mbi “vjedhje”, por me respekt për krijimtarinë.
Kodi i ri synon të udhëzojë kompanitë se si të zbatojnë rregullat e reja të BE-së për AI. Megjithatë, përmbajtja e tij është kritikuar: botuesit janë të shqetësuar për ndikimin në të drejtën e autorit, ndërsa kompanitë amerikane si Meta e quajnë atë të rreptë dhe kufizues.
Komisioni Europian ka vonuar publikimin e draftit të fundit për shkak të kërkesave të shumta për më shumë kohë. Qëllimi është që ai të publikohet para verës, ndërsa më 2 gusht hyjnë në fuqi rregullat për mjetet AI me përdorim të përgjithshëm, si ChatGPT.
Ndërkohë, administrata amerikane dhe kompanitë e mëdha teknologjike shprehin shqetësime se rregullat e BE-së mund të dëmtojnë inovacionin. Megjithatë, një zyrtar i Komisionit tha se kompanitë amerikane po tregohen të angazhuara.
Lexo edhe ‘Kriminale’: Elton John dënon planet e Mbretërisë së Bashkuar për të drejtat e autorit në AI
Vetë Ligji për AI në BE hyri në fuqi në gusht 2024 dhe do të zbatohet plotësisht në vitin 2027.
Edhe muzikanti i famshëm Elton John është shprehur kundër planeve për të përjashtuar kompanitë teknologjike nga rregullat e të drejtave të autorit, duke thënë se ndjehet i “tradhtuar”.
