Ekrani i telefonit mund të ndikojë në gjumin tuaj, si mund ta ndaloni shikimin e pafund në shtrat?

1. Telefonat dhe gjumi nuk shkojnë mirë bashkë
Shumë njerëz përdorin telefonin para se të flenë, edhe pse dihet se kjo ndikon negativisht në gjumë. Drita e ekranit mashtron trurin duke menduar se është ende ditë, gjë që ul prodhimin e melatoninës – hormoni që na ndihmon të flemë. Si pasojë, gjumi vonohet dhe nuk është cilësor. Mungesa e gjumit është lidhur prej kohësh me probleme shëndetësore, madje një studim i fundit tregon se gjumi i çrregullt në moshë të re mund të ndikojë në kujtesë dhe mendim më vonë në jetë.

2. Trupi ka nevojë për kohë për t’u qetësuar
Përdorimi i telefonit ngatërron ritmin natyral të trupit (cirkadian), i cili kontrollon gjumin dhe hormone të tjera. Ekspertët thonë se truri ka nevojë për kohë për të kaluar nga gjendja aktive në atë të pushimit, njësoj si një ushqim që duhet të ftohet para se të futet në frigorifer. Nëse nuk i japim kohë vetes për t’u qetësuar, gjumi nuk do të jetë i thellë dhe i shëndetshëm.

3. Doomscrolling – kur humb kontrollin
Shpesh ndodh që nisim të shohim disa video dhe përfundojmë duke kaluar gjysmë ore ose më shumë duke lëvizur pa pushim në rrjete sociale. Kjo quhet “doomscrolling” – dhe është lidhur me pasoja të këqija për shëndetin mendor dhe fizik. Edhe pse shumë studime fokusohen tek të rinjtë, edhe të rriturit, veçanërisht ata në moshë të mesme, kanë vështirësi me këtë zakon.

4. Si të ndryshosh rutinën para gjumit
Ekspertët sugjerojnë të krijosh një rutinë të re që nuk përfshin ekranin. Mund të lexosh një libër fizik, të bësh një dush të ngrohtë, të dëgjosh një podcast, të përgatitësh gjërat për ditën tjetër ose të kalosh kohë me familjen. Shkruaj në letër një listë të gjërave që të pëlqejnë, por që nuk arrin t’i bësh zakonisht. Gjithashtu, është mirë që aktivitetet para gjumit t’i bësh në një vend tjetër nga shtrati, që trupi të mësojë se shtrati është për gjumë.

Lexo edhe: A është e vërtetë ‘kalbja e trurit’? Ja si ndikon koha e tepërt para ekranit në trurin tonë

5. Nëse nuk mund të heqësh dorë, zvogëlo dëmin
Nëse nuk e ke të mundur të heqësh dorë krejtësisht nga telefoni para gjumit, mund të marrësh disa masa për të zvogëluar dëmin: vendos telefonin në “night mode”, ul ndriçimin, mbaje larg fytyrës dhe mos e drejto drejt e në sy. Aktivizo “mos shqetëso” për të mos u tunduar nga njoftimet. Pyet veten pse po e përdor telefonin natën – ndoshta të duhet më shumë kohë për veten gjatë ditës. Jepi vetes më shumë kënaqësi më herët, që të mos kesh nevojë për telefonin si “shpërblim” natën.