Gratë janë tre herë më të rrezikuara se burrat që të humbin punën nga Inteligjenca Artificiale

Një raport i ri i udhëhequr nga Kombet e Bashkuara tregon se gratë që punojnë në vende me të ardhura të larta janë më të rrezikuara sesa burrat që të zëvendësohen nga Inteligjenca Artificiale (AI).

Sipas këtij raporti nga Organizata Ndërkombëtare e Punës (ILO) dhe Instituti Kombëtar i Kërkimeve në Poloni, rreth 10% e profesioneve ku dominojnë gratë mund të zëvendësohen nga AI, ndërkohë që për burrat ky rrezik është vetëm 3.5%.

Dallimi më i madh mes grave dhe burrave shihet në vendet e zhvilluara ekonomikisht. Aty, 41% e punëve të grave mund të preken nga AI, krahasuar me 28% të punëve të burrave. Në Europë dhe Azi Qendrore, rreziku prek 39% të grave dhe 26% të burrave.

Këto rezultate lidhen me llojin e profesioneve që zakonisht bëhen nga gratë dhe që janë më të ndjeshme ndaj automatizimit. Për shembull, punët si operatore të të dhënave, daktilografiste, përpunuese teksti, kontabiliste dhe sekretare janë disa nga profesionet më të ekspozuara ndaj AI, për shkak të detyrave si mbajtja e shënimeve apo caktimi i takimeve.

Edhe profesionet si zhvillues webi, specialistë të bazave të të dhënave dhe punonjës në sektorin financiar e teknologjik janë gjithashtu të ekspozuar.

Megjithatë, raporti thekson se këto janë vetëm rreziqe të mundshme dhe jo humbje reale të vendeve të punës. Zëvendësimi i plotë i njeriut nga AI është ende i kufizuar, sepse shumica e punëve kërkojnë ndërhyrje dhe gjykim njerëzor.

Studiuesit analizuan të dhënat nga 1,640 punonjës në Poloni dhe i krahasuan me informacione për rreth 2,500 profesione dhe mbi 29,000 detyra pune për të kuptuar sa të automatizueshme janë ato.

Raporti bën thirrje që qeveritë, punëdhënësit dhe organizatat e punëtorëve të punojnë bashkë për të ndërtuar strategji gjithëpërfshirëse që mbrojnë cilësinë e punës dhe produktivitetin.

“Është e lehtë të humbasësh në zhurmën që bëhet për AI-n,” tha Janine Berg, ekonomiste në ILO. “Ajo që na duhet është qartësi dhe kontekst.”