Thinking Machines Lab i Mira Muratit ofron paga marramendëse, ja shifrat

Startup-i “Thinking Machines Lab” (TML), i themeluar në fillim të këtij viti nga ish-CTO-ja e OpenAI, Mira Murati, po bën bujë për shkak të pagave të larta që po ofron për punonjësit teknikë – edhe pse ende nuk ka publikuar ndonjë produkt.

Sipas raportimeve nga Business Insider, TML po i paguan disa prej punonjësve të saj teknikë paga që arrijnë deri në 500,000 dollarë në vit.

Konkretisht, dy anëtarë të stafit marrin nga 450,000 dollarë në vit, një tjetër 500,000 dollarë, ndërsa një punonjës i katërt, i listuar si bashkëthemelues dhe specialist i të mësuarit automatik, gjithashtu fiton 450,000 dollarë në vit.

Të dhënat vijnë nga aplikimet federale për vizat H-1B – një skemë që lejon kompanitë amerikane të punësojnë punëtorë të huaj të specializuar.

Meqë kompanitë rrallë bëjnë publike pagat e brendshme, këto dokumente ofrojnë një detaje mbi tregun e etur për talentet në AI.

Shifrat përfaqësojnë vetëm pagat bazë, pa përfshirë shpërblimet e nënshkrimit apo opsionet mbi aksione – bonuse që zakonisht përbëjnë pjesën më të madhe të fitimeve për punonjësit e startup-eve të teknologjisë.

Të dhënat datojnë nga tremujori i parë i vitit, përpara se Murati të siguronte një financim prej 2 miliardë dollarësh me një vlerësim të TML prej 10 miliardë dollarësh.

Kjo ndodhi gjithashtu përpara marrëveshjes së Meta-s për të punësuar CEO-n e Scale AI, Alexandr Wang, në një pazar prej 14.3 miliardë dollarësh për 49% të kompanisë së tij – duke rritur garën për talentet në AI në një nivel të ri intensiteti.

Sipas një deklarate të mëhershme të CEO-së së OpenAI, Sam Altman, Meta ka ofruar bonuse nënshkrimi deri në 100 milionë dollarë për të tërhequr emra të mëdhenj të industrisë.

Lexo edhe: Investimi 10 mln euro në startupin e Mira Muratit shkon në Kuvend/ Malaj: Përfitimet afatgjata

Pagat mesatare që ofron TML janë dukshëm më të larta se ato të konkurrentëve të saj kryesorë. Sipas dokumenteve të zbuluara:

TML: paga mesatare prej 462,500 dollarësh për katër punonjës teknikë.

OpenAI: mesatarisht 292,115 dollarë për 29 punonjës teknikë, me pagën më të lartë në 530,000 dollarë.

Anthropic: mesatarisht 387,500 dollarë për 14 punonjës teknikë, ku pozicioni më i paguar arrin 690,000 dollarë.

Mira Murati kaloi më shumë se gjashtë vjet në OpenAI, ku luajti rol kyç në zhvillimin e ChatGPT dhe projekte të tjera kërkimore në AI.

Në nëntor 2023, ajo u emërua përkohësisht si CEO i OpenAI, pas shkarkimit të papritur të Sam Altman, përpara se ai të rikthehej në detyrë dhe Murati të rikthente rolin e saj si CTO.