Mira Murati lançon produktin e parë të kompanisë Thinking Machines

Ish-CTO e OpenAI, Mira Murati, ka prezantuar produktin e parë të startup-it të saj të inteligjencës artificiale, Thinking Machines. Produkti, i quajtur Tinker, është një API fleksibël që u mundëson studiuesve dhe zhvilluesve të përsosin modelet e gjuhës sipas nevojave të tyre.

Thinking Machines u bë një nga startup-et më të përfolura në botën e AI-së që në korrik, kur tërhoqi mbi 2 miliardë dollarë investime, në një raund të udhëhequr nga Andreessen Horowitz (A16z), duke arritur një vlerësim prej 12 miliardë dollarësh, megjithëse nuk kishte ende një produkt në treg. Ndër investitorët ishin edhe gjigantët Nvidia, AMD, Cisco, Accel dhe ServiceNow.

Murati, e cila ka luajtur një rol kyç në zhvillimin e ChatGPT gjatë kohës së saj në OpenAI, tha në njoftimin për publikimin e produktit:
“Tinker i ofron studiuesve mjetet e nevojshme për të eksperimentuar me modelet, për të ndërtuar trajnime të personalizuara dhe për të përballuar kompleksitetin e trajnimeve të shpërndara. Jam e emocionuar të shoh se çfarë do të krijojnë njerëzit me të.”

Lexo edhe: Thinking Machines Lab i Mira Muratit ofron paga marramendëse, ja shifrat

Sipas kompanisë, Tinker do t’i ndihmojë studiuesit të kontrollojnë algoritmet dhe të dhënat që përdorin, ndërsa Thinking Machines do të kujdeset për proceset komplekse të trajnimit dhe menaxhimit të infrastrukturës. Shërbimi përshkruhet si “i menaxhuar”, që funksionon mbi klasterët e brendshëm të kompanisë dhe përdor LoRA (Low-Rank Adaptation) për të ulur kostot e llogaritjeve.

Tinker ofron mundësinë për të përshtatur një gamë të gjerë modelesh të hapura, nga më të voglat deri tek ato më të avancuarat si Qwen-235B-A22B – modeli i gjigantit Alibaba që konkurron me DeepSeek. Ndryshimi midis modeleve kërkon vetëm një rresht kodi në Python, sipas kompanisë.

Për të ndihmuar përdoruesit të arrijnë rezultate më të mira, Thinking Machines ka publikuar gjithashtu një bibliotekë me burim të hapur në GitHub të quajtur Tinker Cookbook, e cila përmban metoda moderne pas-trajnimi që punojnë mbi API-në e re.

Aktualisht, Tinker është në fazë private beta dhe studiuesit apo zhvilluesit mund të regjistrohen në listën e pritjes përmes faqes zyrtare të Thinking Machines. Kompania ka njoftuar se produkti do të jetë fillimisht falas, por do të kalojë në një model pagesash bazuar në përdorim gjatë javëve në vijim.