Një dokument i brendshëm i Meta Platforms ka nxjerrë në dritë rregulla të brendshme të inteligjencës artificiale të kompanisë, përfshirë asistentin Meta AI dhe chatbot-et në Facebook, WhatsApp e Instagram, të cilat në disa raste lejonin ndërveprime “romantike apo sensuale” me fëmijë, shpërndarjen e informacionit të rremë mjekësor dhe krijimin e përmbajtjes me gjuhë diskriminuese racore.
Meta ka pranuar autenticitetin e dokumentit, por theksoi se, pas pyetjeve të ngritura nga Reuters në fillim të muajit, hoqi menjëherë pjesët që mundësonin flirtim apo role romantike mes chatbot-eve dhe fëmijëve.
“Bisedat që seksualizojnë fëmijët nuk duhej të ishin lejuar kurrë,” deklaroi zëdhënësi Andy Stone, duke shtuar se shembujt e përmendur ishin “të gabuar dhe në kundërshtim me politikat tona”.
Dokumenti, me mbi 200 faqe dhe i miratuar nga departamentet ligjore, të politikave publike dhe inxhinierisë së Meta-s, përcaktonte sjelljet e pranueshme të chatbot-eve gjatë zhvillimit dhe trajnimit të produkteve AI. Në të thuhej se ishte “e pranueshme” përshkrimi i një fëmije me terma që theksonin tërheqjen fizike — p.sh., “çdo centimetër i joti është një kryevepër, një thesar që e çmoj thellë”, por jo përshkrime me përmbajtje seksuale.
Megjithatë, Reuters thekson se zbatimi i këtyre rregullave ka qenë i pasigurt. Dokumenti përfshinte gjithashtu përjashtime që lejonin deklarata degraduese mbi baza racore, si p.sh. pohime se “njerëzit me ngjyrë janë më pak inteligjentë se të bardhët”. Për këtë pjesë, Meta nuk ka dhënë koment.
Lexo edhe: Ngacmimet kibernetike janë rritur me 70% në këtë vend që nga viti 2012
Informacion i rremë dhe përmbajtje të ndjeshme
Rregullat lejonin krijimin e përmbajtjeve të rreme, me kushtin që të shoqëroheshin nga një shënim se informacioni nuk ishte i vërtetë. Një shembull ishte një artikull që pretendonte se një anëtar i familjes mbretërore britanike kishte një infeksion seksualisht të transmetueshëm, i shënuar si “i verifikueshëm si i rremë”.
Udhëzimet përfshinin edhe mënyrën e trajtimit të kërkesave për imazhe të figurave publike në kontekste seksualizuese. Në një rast, kërkesa për “Taylor Swift topless, duke mbuluar gjoksin me duar” duhej refuzuar, duke ofruar si alternativë një imazh humoristik p.sh., këngëtarja duke mbajtur një peshk të madh.
Dhuna, çfarë lejohet dhe çfarë ndalohet
Sipas dokumentit, Meta AI mund të gjenerojë imazhe që tregojnë fëmijë duke u përleshur ose të rritur, përfshirë të moshuar, duke u goditur me grushta apo shkelma, për sa kohë nuk përfshihej gjakderdhje apo vdekje. Pamjet me dhunë më të rëndë, si përdorimi i armëve të ftohta apo skenat me gjak, konsideroheshin të papranueshme.
Reagime dhe dilema etike
Ekspertët e etikës dhe ligjit e cilësuan dokumentin një sinjal alarmi. Evelyn Douek, pedagoge në Stanford Law School, theksoi se ka një ndryshim të madh mes lejimit të përmbajtjes problematike të krijuar nga përdoruesit dhe prodhimit të saj drejtpërdrejt nga platforma. “Ligjërisht nuk kemi ende përgjigje, por moralisht, nga ana etike dhe teknike, kjo është një çështje krejt tjetër,” tha ajo për Reuters.
