A e ke vënë re që fatura e energjisë po vjen çdo muaj më e lartë? Shpesh nuk është vetëm rritja e çmimeve, por edhe mënyra si i përdorim pajisjet tona elektroshtepiake. Disa prej tyre janë “përbindësha energjie” që punojnë pa pushim dhe shpenzojnë shumë më tepër se ç’mund të imagjinonim.
Frigoriferi është një ndër fajtorët kryesorë, pasi është në funksion 24 orë në ditë. Pas tij renditen lavatriçja, tharësja e rrobave dhe lavastovilja, të cilat kërkojnë shumë energji sa herë që i përdorim. Por kulmin e shpenzimeve e sjellin kondicionerët në verë dhe bojlerët në dimër, që konsumojnë energji të lartë për të freskuar apo ngrohur ambientet. Edhe furra elektrike dhe sobat moderne për gatim janë në listën e pajisjeve që rëndojnë xhepin çdo muaj.
Ekspertët paralajmërojnë: nëse nuk i përdorim me kujdes, këto pajisje mund të na dyfishojnë faturën e energjisë. Zgjidhja? Pajisje me klasë të lartë kursimi (A+ ose më shumë), përdorimi i programeve ekonomike, dhe mbi të gjitha, fikja e pajisjeve që lëmë shpesh ndezur kot. Një menaxhim më i zgjuar i këtyre “vampirëve të energjisë” jo vetëm që kursen para, por ndihmon edhe në mbrojtjen e mjedisit.
Lexo edhe: 8 këshilla për të rritur jetëgjatësinë e baterisë së iPhone-it tuaj
Një mënyrë e thjeshtë për të kursyer është ta përdorim lavatriçen ose lavastoviljen vetëm kur janë plot. Po ashtu, zgjidhja e programeve me temperatura të ulëta bën një diferencë të madhe në konsumin e energjisë. Në rastin e kondicionerit, mbajtja e një temperature konstante (jo shumë të ulët apo shumë të lartë) ndihmon që pajisja të mos punojë pa pushim.
Gjithashtu, fikja e bojlerit menjëherë pas ngrohjes së ujit dhe përdorimi i llambave LED mund të ulin ndjeshëm shpenzimet mujore. Shumë njerëz lënë pajisjet të lidhura me prizë edhe kur nuk i përdorin, por edhe ky “detaj i vogël” shton koston e energjisë. Duke bërë ndryshime të vogla në përditshmëri, mund të arrijmë kursime të mëdha në fund të muajit.
1 Comment
Pingback: Kondicionerët, ndotës të padukshëm në ambientet tona të brendshme - Technews.al