Çfarë është vibe coding dhe pse Lovable po bën kaq bujë në Europë?

Lovable, një start-up suedez me bazë në Stokholm, është bërë një nga kompanitë më të përfolura në teknologji falë vibe coding – një mënyrë ndërtimi programesh me ndihmën e inteligjencës artificiale. Në vitin e parë, kompania gjeneroi mbi 100 milionë dollarë dhe arriti një vlerësim prej rreth 1.5 miliardë eurosh pas një financimi rekord.

Me Lovable, përdoruesit nuk kanë nevojë të dinë programim. Ata thjesht shkruajnë një përshkrim të idesë së tyre dhe AI krijon aplikacione, faqe interneti ose mjete të brendshme. Ky proces është shumë më i shpejtë se metodat tradicionale, sepse një ide mund të testohet menjëherë pa kaluar muaj të tërë planifikimi e zhvillimi.

Një shembull i suksesit është kompania braziliane Qconcursos, e cila krijoi një aplikacion të ri me Lovable dhe gjeneroi 3 milionë dollarë të ardhura për vetëm 48 orë. Termi vibe coding u përdor për herë të parë nga Andrej Karpathy, bashkëthemelues i OpenAI, dhe synon që në të ardhmen të lehtësojë edhe punë si “debugging”, duke i bërë të arritshme për këdo detyra që dikur ishin vetëm për inxhinierët.

Ambicia e Lovable është të bëhet kompania e parë evropiane që vlen një trilion dollarë. CEO i saj, Anton Osika, thotë se vizioni është që Lovable të bëhet “pjesa e fundit e softuerit” – pra, që njerëzit të mos kenë më nevojë të shkruajnë kod, por të punojnë vetëm përmes ndërfaqes intuitive të AI. Vetëm këtë vit, mbi 10,000 kompani të reja në Evropë kanë ndërtuar produkte duke përdorur Lovable.

Lexo edhe: ChatGPT do t’u bëjë të ditur prindërve nëse fëmija është në “shqetësim akut”

Lovable po tërheq gjithashtu komunitete globale: çdo javë, ekipe nga vende të ndryshme mblidhen për të ndërtuar prototipe me këtë platformë. Në Evropë, firma e kapitalit sipërmarrës Project Europe organizoi një hackathon ku 20 start-up-e krijuan aplikacione të fuqizuara nga AI brenda një nate. Sipas Osika, kjo është një epokë e re ku kushdo mund të bëhet zhvillues dhe të kontribuojë në përmirësimin e përvojave digjitale.