Australia vendos rregulla të forta për lojën Roblox: qëllimi, mbrojtja e fëmijëve online

Australia ka vendosur standarde të detyrueshme për platformat e lojërave online si Roblox, duke kërkuar masa më të forta kundër përmbajtjeve dhe sjelljeve më të rrezikshme në internet, përfshirë abuzimin dhe shfrytëzimin seksual të fëmijëve. Nëse nuk zbaton këto rregulla deri në dhjetor, Roblox rrezikon gjoba deri në 49.5 milionë dollarë.

Pas këtyre presioneve, Roblox ka premtuar se deri në fund të vitit 2025 do të zbatojë një paketë të re masash sigurie për përdoruesit e vegjël në Australi. Ndryshimet përfshijnë: llogari private automatikisht për fëmijët nën 16 vjeç, bllokimin e kontakteve nga të rriturit pa lejen e prindërve, kufizimin e chat-it direkt dhe në lojë, si dhe kontrolle shtesë për prindërit. Për më tepër, nuk do të lejohet voice chat mes të rriturve dhe fëmijëve 13–15 vjeç.

Komisionerja e Sigurisë Online në Australi, Julie Inman Grant, tha se platformat e dashura për fëmijët shpesh shndërrohen edhe në terren për abuzuesit online, ndaj këto rregulla janë të domosdoshme. Ajo theksoi se Roblox, përveç chat-it, duhet të sigurojë që edhe funksione të reja si videot e shkurtra, opsionet e “dating” apo qendrat virtuale tregtare të jenë të sigurta.

Lexo edhe: Kujdes nëse luani GTA dhe Minecraft, hakerat po i përdorin si karrem për sulme 

Autoritetet australiane paralajmërojnë se do të ndjekin nga afër zbatimin e angazhimeve dhe në rast shkeljesh ose vonesash, do të marrin masa ligjore. Përveç kësaj, faza e dytë e kodeve të industrisë tashmë synon edhe përmbajtjet e papërshtatshme për moshën, si pornografia dhe materialet që lidhen me vetëdëmtimin apo çrregullimet e të ngrënit.