Meta do të përdorë bisedat tuaja për t’ju shfaqur reklama të targetuara

Meta po përgatitet të përdorë ndërveprimet e përdoruesve me inteligjencën e saj artificiale për të personalizuar reklamat në platformat Facebook, Instagram, WhatsApp dhe Messenger. Kompania ka bërë të ditur se si bisedat me asistentin digjital — qoftë me zë apo tekst — do të shërbejnë për të ndërtuar një profil më të saktë të interesave të përdoruesve, duke ndikuar drejtpërdrejt në reklamat dhe përmbajtjet që do të shfaqen.

Adam Mosseri, drejtues i Instagram-it, mohoi zërat se kompania përdor mikrofonët e telefonave për të përgjuar përdoruesit. “Betohem, nuk e dëgjojmë mikrofonin tuaj,” tha ai. Por, me ndryshimet e reja, Meta as që ka nevojë për mikrofon.

Christy Harris, menaxhere e politikave të privatësisë dhe të dhënave në Meta, shpjegoi se kjo do të thotë se nëse një përdorues kërkon ndihmë nga Meta AI për të planifikuar pushimet familjare, reklamat që do të shfaqen më pas mund të jenë për hotele apo destinacione turistike familjare.

Lexo edhe: Meta lançon “Vibes”, një feed videosh të shkurtra të gjeneruara nga AI

Përdoruesit nuk kanë mundësi të çregjistrohen nga kjo praktikë, përveçse të mos përdorin fare Meta AI. Ndryshimet do të nisin në Shtetet e Bashkuara më 7 tetor dhe do të hyjnë në fuqi më 16 dhjetor. Në Mbretërinë e Bashkuar dhe në Bashkimin Evropian, zbatimi do të vijë më vonë, duke u përshtatur me rregulloret për mbrojtjen e të dhënave (GDPR).

Meta ka pasur vonesa më parë për të sjellë shërbimet e saj në Evropë pikërisht për shkak të rregulloreve më strikte, që kufizojnë përdorimin e të dhënave dhe vendosin kushte më të barabarta mes gjigantëve teknologjikë dhe kompanive më të vogla. Kjo e bën ende të paqartë nëse praktika e re e Meta-s do të përballet me sfida ligjore në BE.