Google ka njoftuar zgjerimin e aksesit për aplikacionin e saj me inteligjencë artificiale Opal në 15 vende të reja. Kjo platformë inovative, e cila lejon përdoruesit të krijojnë mini-aplikacione në ueb vetëm përmes përshkrimeve me tekst, tashmë është e disponueshme në Kanada, Indi, Japoni, Korenë e Jugut, Vietnam, Indonezi, Brazil, Singapor, Kolumbi, El Salvador, Kosta Rika, Panama, Honduras, Argjentinë dhe Pakistan.
Megan Li, menaxhere e lartë produkti në Google Labs, tha në një postim në blog se kompania nuk e kishte parashikuar reagimin e jashtëzakonshëm që mori nga përdoruesit në SHBA.
“Kur e lançuam Opal në SHBA, prisnim që njerëzit të krijonin mjete të thjeshta dhe argëtuese. Por ajo që pamë ishte një valë aplikacionesh të sofistikuara, praktike dhe jashtëzakonisht kreative. Kjo tregoi qartë një gjë: duhet ta sjellim Opal në duart e më shumë krijuesve anembanë botës,” u shpreh ajo.
Si funksionon Opal?
Përdoruesi thjesht shkruan një përshkrim të aplikacionit që dëshiron të krijojë, dhe sistemi përdor modele të ndryshme të Google për ta ndërtuar automatikisht. Më pas, përdoruesit mund të hapin panelin e redaktimit për të parë dhe personalizuar rrjedhën vizuale të inputeve, outputeve dhe hapave të gjenerimit. Ata mund të modifikojnë çdo hap, të shtojnë të rinj përmes toolbar-it të Opal-it dhe madje të publikojnë aplikacionin e tyre online për ta ndarë me të tjerët.
Përmirësime të reja për përvojë më të mirë
Së bashku me zgjerimin global, Google njoftoi edhe disa përmirësime të rëndësishme për Opal. Kompania ka përmirësuar ndjeshëm sistemin e debugging, duke e mbajtur megjithatë platformën pa kod. Tani përdoruesit mund të ekzekutojnë çdo hap individualisht në editorin vizual, ndërsa gabimet shfaqen në kohë reale, për ta bërë procesin më të lehtë dhe më të qartë.
Gjiganti teknologjik theksoi gjithashtu se ka përshpejtuar ndjeshëm performancën bazë të Opal-it. Në të kaluarën, krijimi i një projekti të ri mund të zgjaste deri në pesë sekonda ose më shumë; tani ky proces është shumë më i shpejtë. Për më tepër, përdoruesit mund të ekzekutojnë disa hapa paralelisht, duke mundësuar krijimin e rrjedhave komplekse pune në më pak kohë.
Me lançimin e Opal në SHBA në korrik, Google iu bashkua një liste në rritje konkurrentësh si Canva, Figma dhe Replit, të cilat po zhvillojnë mjete që u lejojnë përdoruesve pa njohuri teknike të dizajnojnë prototipe aplikacionesh pa pasur nevojë për të shkruar asnjë rresht kodi.
