Shpejtësia e WiFi-t në tren: Cilat vende europiane ofrojnë internetin më të shpejtë?

Udhëtimet me tren po njohin një rritje të ndjeshme në gjithë kontinentin, teksa gjithnjë e më shumë njerëz zgjedhin hekurudhën për udhëtime pune apo pushimi. Por, sipas disa sondazheve, lidhja e qëndrueshme me internet mbetet një sfidë e madhe për pasagjerët.

Në Mbretërinë e Bashkuar, për shembull, 70 për qind e pasagjerëve raportuan ndërprerje të shpeshta të WiFi-t gjatë udhëtimeve të tyre, sipas një studimi nga Uswitch.

“Një nga përparësitë kryesore të udhëtimit me tren është mundësia që koha e udhëtimit të përdoret për punë ose për komunikim social, por për ta arritur këtë nevojitet lidhje e pandërprerë me rrjetin celular,” – tha Chris Page, kryetar i grupit britanik të advokimit Railfuture.

Cilat vende ofrojnë WiFi më të shpejtë në trena?

Sipas të dhënave të Speedtest Intelligence për tremujorin e dytë të vitit 2025, publikuar nga Ookla, Suedia rezulton vendi me WiFi-n më të shpejtë në trena në gjithë Evropën – dhe me diferencë të madhe.

Ajo regjistroi një shpejtësi mesatare shkarkimi prej 64.6 megabit për sekondë (Mbps), më shumë se katër herë mbi mesataren evropiane prej 7.6 Mbps, dhe plot 150 herë më e shpejtë se Holanda, e cila renditet e fundit me vetëm 0.4 Mbps.

Përveç Suedisë, edhe Zvicra (29.8 Mbps), Irlanda (26.3 Mbps) dhe Çekia (23.4 Mbps) kanë WiFi me shpejtësi mbi 20 Mbps. Franca, ndërkohë, i afrohet këtij niveli me 19.1 Mbps.

Mbretëria e Bashkuar dhe Spanja me shpejtësi nën 2 Mbps

Në kontrast, disa nga ekonomitë më të mëdha evropiane renditen në fund të listës.
Holanda është në vendin e fundit (0.4 Mbps), e ndjekur nga Austria (0.7 Mbps), Mbretëria e Bashkuar (1.1 Mbps) dhe Spanja (1.5 Mbps).

Italia (4.8 Mbps) renditet gjithashtu poshtë mesatares, në ndryshim nga Gjermania, e cila ka një performancë shumë më të mirë me 14.9 Mbps.
Në mes të tabelës qëndron Norvegjia me 7.6 Mbps, ndërsa Rumania shënon një rezultat të mirë me 12.5 Mbps.

Pse Suedia është përjashtim?

Suedia kryeson edhe për shpejtësinë e ngarkimit (upload), me një mesatare prej 55 Mbps, mbi dy herë më të lartë se Zvicra (25.6 Mbps). Kjo tregon se cilësia e rrjetit në trenat suedezë është në nivel shumë më të lartë krahasuar me pjesën tjetër të Evropës.

Pse ndryshon kaq shumë cilësia e WiFi-t në Evropë?

Ekspertët e lidhjes celulare theksojnë se performanca e internetit në trena varet nga mënyra se si shtetet trajtojnë linjat hekurudhore – nëse ato janë zona të dedikuara me mbulim prioritar apo jo.

Vendet që kanë investuar në infrastrukturë të posaçme përgjatë linjave hekurudhore, si sistemet në tunele apo antenat anës shinat, kanë më pak “zona të vdekura” pa mbulim interneti.

“Cilësia e WiFi-t nuk është çështje e trenit në vetvete, por e gjithë sistemit që e mbështet atë,” – shpjegon Laurent Troger, ish-president i Bombardier Transportation.

Lexo edhe: Kjo linjë ajrore amerikane do të ofrojë WiFi falas në çdo fluturim – ja risia

Një pjesë e madhe e trenave evropianë ende përdorin teknologjinë Wi-Fi 4 dhe bandën 2.4 GHz, e cila është e mbingarkuar. Kalimi në Wi-Fi 5 dhe 5 GHz përmirëson ndjeshëm përvojën e përdoruesit.

Shembujt e Zvicrës dhe Suedisë tregojnë se investimet publike dhe politika e qartë në mbulimin me rrjet përgjatë hekurudhave japin rezultate konkrete: mbulim i plotë me 4G në tunele si Gotthard Base Tunnel dhe zbatimi i teknologjisë 5G për rrugët hekurudhore.

Ndërkohë, në shumë vende të tjera evropiane, mbulimi i dobët jashtë qyteteve mbetet problem, duke shkaktuar ndërprerje të shpeshta gjatë udhëtimeve.

“Edhe brenda të njëjtit vend, cilësia e WiFi-t në trena ndryshon ndjeshëm nga një rajon në tjetrin,” – shton Troger, duke theksuar se mesataret kombëtare mund të fshehin diferenca të mëdha lokale.