Vitin e ardhshëm nuk do të ketë më tarifa roaming mes Shqipërisë dhe vendeve të BE

Një lajm i mirë për qytetarët shqiptarë që udhëtojnë shpesh drejt vendeve të Bashkimit Evropian: tarifat e roamingut do të hiqen plotësisht duke filluar nga viti i ardhshëm. Lajmin e dha presidentja e Komisionit Evropian, Ursula von der Leyen, gjatë vizitës së saj në Tiranë, ku theksoi se ky është një hap konkret drejt afrimit të Shqipërisë me tregun e përbashkët europian.

“Kur folëm për projektin SEPA-n (Zona Unike e Pagesave në Euro), ai dukej një projekt ambicioz. Sot, përfshirja e Shqipërisë në këtë projekt është një arritje konkrete. Vitin që vjen do të hiqen të gjitha tarifat e roaming-ut mes Shqipërisë dhe BE-së. Kjo është një gjë shumë e mirë për biznesin, për turizmin dhe, veçanërisht, për të afruar popujt dhe njerëzit me njëri-tjetrin,” deklaroi Von der Leyen në konferencën e përbashkët me kryeministrin Edi Rama. Sipas saj, ky vendim tregon se qytetarët shqiptarë duhet të ndihen “si në shtëpinë e tyre” kur udhëtojnë në territorin e BE-së.

Ky zhvillim vjen pas marrëveshjes së vitit 2023 ndërmjet operatorëve të Ballkanit Perëndimor dhe atyre evropianë, që solli një ulje të ndjeshme të çmimeve të internetit dhe telefonisë gjatë udhëtimeve. Eliminimi i plotë i tarifave konsiderohet si faza përfundimtare e këtij procesi, që do të lehtësojë komunikimin dhe do të reduktojë ndjeshëm kostot për qytetarët dhe bizneset.

Lexo edhe: Shpejtësia e WiFi-t në tren: Cilat vende europiane ofrojnë internetin më të shpejtë?

Ekspertët e telekomunikacionit e kanë cilësuar këtë nismë si një hap historik drejt integrimit digjital të Shqipërisë në tregun evropian. Megjithatë, mbetet për t’u parë si do të zbatohet në praktikë, pasi kërkohet koordinim i ngushtë mes autoriteteve kombëtare dhe Komisionit Evropian për harmonizimin e rregullave teknike.

Nëse gjithçka ecën sipas planit, nga viti 2026 shqiptarët që udhëtojnë në vendet e BE-së do të mund të telefonojnë, dërgojnë mesazhe dhe përdorin internetin pa paguar tarifa shtesë./GeekRoom