Më shumë se 850 figura publike nga bota e teknologjisë, shkencës dhe biznesit kanë bërë thirrje për një ngadalësim të garës globale drejt krijimit të superinteligjencës artificiale (AI) — një formë e inteligjencës që mund të tejkalojë kapacitetet mendore të njeriut. Në letrën e hapur, ata paralajmërojnë se kjo garë e pakontrolluar mund të sjellë pasoja serioze, që nga zëvendësimi ekonomik i njerëzve dhe humbja e lirive civile, deri tek rreziku i zhdukjes së njerëzimit.
Në mesin e firmëtarëve janë emra të njohur si fituesi i Çmimit Nobel Geoffrey Hinton dhe Yoshua Bengio, të konsideruar “baballarët e inteligjencës artificiale”, si edhe bashkëthemeluesi i Apple Steve Wozniak dhe themeluesi i Virgin Group, Richard Branson. Ata kërkojnë ndalimin e zhvillimit të superinteligjencës derisa të arrihet një konsensus i gjerë shkencor që garanton sigurinë dhe kontrollin mbi teknologjinë, si dhe miratim publik për mënyrën e përdorimit të saj.
Superinteligjenca përkufizohet si një formë AI që tejkalon aftësitë njohëse të njeriut. Që në vitet 1950, shkencëtari Alan Turing paralajmëroi se makineritë që mendojnë më mirë se njerëzit mund të marrin kontrollin, një skenar që shumë ekspertë sot e shohin si gjithnjë e më të mundshëm. Ndërkohë, kompani të mëdha si Meta po përdorin termin “superinteligjencë” për të promovuar modelet e tyre më të fundit të inteligjencës artificiale, si në rastin e “Meta Superintelligence Labs”.
Lexo edhe: Një gjeneral i lartë i Ushtrisë Amerikane ka zbuluar se ka përdorur IA për vendime kyçe ushtarake
Disa liderë teknologjikë, përfshirë CEO-n e OpenAI Sam Altman, kanë pranuar më parë se krijimi i inteligjencës artificiale me kapacitete mbi-njerëzore mund të jetë “kërcënimi më i madh për ekzistencën e njerëzimit”, ndërsa drejtuesi i Microsoft, Mustafa Suleyman, ka theksuar se derisa të provohet qartë që është e sigurt, kjo teknologji nuk duhet zhvilluar. Megjithatë, as Altman dhe as Suleyman nuk ishin në listën e firmëtarëve të letrës, e cila është mbështetur edhe nga akademikë, personalitete mediatike si Stephen Fry dhe Steve Bannon, si dhe udhëheqës fetarë e ish-politikanë.
