Netflix po futet në një epokë të re interaktive. Drejtoresha e teknologjisë (CTO) e kompanisë, Elizabeth Stone, njoftoi në konferencën TechCrunch Disrupt 2025 se platforma do të ofrojë votim në kohë reale për përmbajtjet live, duke i lejuar shikuesit të ndikojnë drejtpërdrejt në atë që po ndodh në ekran.
Kjo veçori u testua për herë të parë gjatë emisionit live “Dinner Time Live with David Chang”, ku shikuesit mund të votonin për tema argëtuese si “ton apo grilled cheese”. Netflix thotë se testet treguan angazhim të vazhdueshëm nga publiku, ndaj teknologjia do të zgjerohet së shpejti edhe në rikthimin e programit të famshëm “Star Search”, ku votat do të vendosin se cilët konkurrentë kalojnë më tej.
Stone shpjegoi se shikuesit do të mund të votojnë nga televizori ose telefoni, brenda një kohe të kufizuar. Nëse nuk jeni në transmetim të drejtpërdrejtë, mund të humbni mundësinë për të votuar. “Kjo është vetëm fillimi i mënyrës se si duam ta bëjmë përmbajtjen më interaktive dhe përfshirëse”, tha ajo, duke shtuar se synimi është që përdoruesit të ndihen si pjesë e historisë.
Përveç votimit, Netflix po zhvillon edhe lojëra sociale për televizorë, që do të mund të luhen me miq e familjarë përmes telefonit, si dhe përvoja vizuale të reja në faqen kryesore — si “Halloween Collection” dhe “Holiday Collection” — që sjellin animacione dhe efekte speciale për ta bërë përmbajtjen më të gjallë dhe më tërheqëse./Techcrunch.com
