Dictionary.com shpalli “67” si fjalën e vitit të 2025-ës, duke deklaruar se pak shprehje të tjera në zhargon kanë përmbledhur shpirtin e këtij viti po aq sa ky numër viral, edhe pse, në vetvete, nuk ka kuptim të qartë.
“Është një pjesë shaka e brendshme, pjesë sinjal social dhe pjesë performancë,” tha Steve Johnson, Drejtori i Leksikografisë në Dictionary Media Group. “Kur njerëzit e thonë, nuk po përsërisin vetëm një meme; po shprehin një ndjenjë.” Prej javësh, TikTok është mbushur me video të fëmijëve që thonë “six, seven” (“gjashtë, shtatë”) ose që shpërthejnë në të qeshura kur dikush tjetër e përmend, me mbi 2 milionë postime që përdorin hashtagun #67, sipas të dhënave të platformës. Statistikat e TikTok tregojnë se përdorimi i hashtagut #67 është rritur ndjeshëm në shtator dhe tetor, ndoshta sepse ky fenomen është përhapur në klasat shkollore me nisjen e vitit të ri akademik. Disa mësues kanë bërë video ku shprehin frustrim, ndërsa të tjerë e kanë kthyer këtë “çmenduri” në mënyrë për të tërhequr vëmendjen e nxënësve.
Origjina e frazës “six, seven” vjen nga një këngë e vitit 2024 e reperit Skrilla, me titull “Doot Doot”, ku ai këndon: “6-7, I just bipped right on the highway.” Vetë Skrilla ka pranuar se shprehja nuk ka asnjë kuptim real. “Nuk i kam dhënë kurrë një domethënie të vërtetë dhe as nuk dua ta bëj,” i tha ai Wall Street Journal, duke shtuar se pikërisht mungesa e kuptimit “është arsyeja pse të gjithë vazhdojnë ta thonë.” Disa e kanë cilësuar fenomenin “six, seven” si shembull të asaj që quhet “brain rot”, një term që përshkruan përmbajtje të pakuptimtë e me vlerë të ulët që qarkullon në internet dhe efektet negative që mund të ketë tek përdoruesit. Pikërisht “brain rot” ishte zgjedhur si fjala e vitit nga Oxford University Press në vitin 2024. Seriali satirik “South Park” ka ironizuar trendin në një episod të ri këtë muaj. Në të, mësuesit e shkollës fillore South Park shqetësohen nga nxënësit që “duken sikur janë pjesë e një kulti me numrat gjashtë dhe shtatë”. Ata thërrasin një “ekspert të fundin e botës” për ta hetuar, i cili rezulton të jetë një parodi e miliarderit Peter Thiel.
Lexo edhe: Oksfordi publikon fjalën e vitit 2024 dhe interneti është kryesisht fajtor për këtë
Si po reagojnë mësuesit ndaj “67”?
Shumë mësues e kanë dokumentuar fenomenin në TikTok, disa me zhgënjim të dukshëm, të tjerë me humor. Disa kanë shpallur ndalimin e numrit “67” në klasat e tyre. Një mësues, në një video me mbi 2.5 milionë pëlqime, i tha klasës së tij të parakalkulusit: “Jeni idiotë,” duke imituar mënyrën si nxënësit e shqiptojnë “six, seven.” Një tjetër mësuese e përdor shprehjen si taktikë për të qetësuar klasën: ajo thotë “six”, dhe nxënësit përgjigjen “seven”, pas së cilës duhet të heshtin. Disa mësues madje kanë bërë shaka duke u dhënë nxënësve teste matematike ku çdo përgjigje ishte “67”.
Si u bë viral trendi “67”?
Kënga “Doot Doot” e Skrilla-s u bë virale në TikTok më herët gjatë vitit, shpesh e shoqëruar me video të basketbollistit 24-vjeçar të NBA, LaMelo Ball, i cili është i gjatë 6 këmbë e 7 inç. Ball pranoi trendin në një intervistë për ESPN, duke thënë se dëgjon shpesh fëmijë që i bërtasin “six, seven” dhe me shaka e quajti veten “me këtë pseudonim të ri”. Trendin e përforcoi edhe një video e famshme e publikuar në YouTube nga influenceri Cam Wilder, ku një djalë brohoret “six, seven” drejt kamerës gjatë një ndeshjeje basketbolli. Ai u bë viral dhe u përdor në qindra video-meme të tjera. Momente të tjera me “six, seven” janë bërë virale, si një turmë njerëzish që shpërthen në të qeshura kur një punonjës i In-N-Out thërret porosinë numër 67, apo valltarë që qeshin kur mësuesja e tyre thotë “six, seven” gjatë numërimit të ritmit. Përdoruesit e TikTok-ut nga gjenerata Z dhe milenialët gjithashtu kanë bërë postime duke ironizuar ndjesinë e “mos kuptimit” të trendeve të reja që përqafohen nga gjeneratat më të reja./forbes
