Jeff Bezos, themeluesi i Amazon dhe Blue Origin, duket se po rikthehet në skenën ekzekutive për herë të parë që prej vitit 2021. Sipas raportimeve të New York Times, miliarderi amerikan ka marrë rolin e bashkë-CEO-s në një start-up të ri të inteligjencës artificiale, të quajtur Project Prometheus.
Projekti mbetet ende i mbuluar me mister, por një gjë është e sigurt: ai po ngjall interes të madh në Silicon Valley. Start-up-i ka siguruar 6.2 miliardë dollarë (5.3 miliardë euro) financim në fazën e hershme, një shumë e jashtëzakonshme për një kompani që sapo nis rrugëtimin e saj dhe që e rendit ndër më të financuarat globalisht në këtë fazë. Një pjesë e këtij financimi vjen vetë nga Bezos, sipas tre burimeve të afërta me projektin.
Nëse konfirmohet zyrtarisht, ky do të ishte angazhimi i tij i parë operacional që nga dorëheqja si CEO i Amazon katër vite më parë.
Bezos, Musk dhe gara e re e AI
Ky zhvillim ka provokuar edhe reagimin e Elon Musk, i cili themeloi kompaninë e tij të inteligjencës artificiale, xAI. Në platformën X, Musk e quajti Bezos një “copycat”, duke rikthyer rivalitetin e gjatë midis dy miliarderëve në një fushë të re: zhvillimin e sistemeve të avancuara të AI-së.
Vitin e kaluar, Bezos investoi edhe në Physical Intelligence, një kompani që përdor AI për robotikë duke treguar qartë se ambiciet e tij në këtë sektor janë shumë më të thella se sa investimet e zakonshme.
Një kompani sekrete, por me talentet më të kërkuar në botë
Informacionet publike për Project Prometheus janë të pakta. Profili në LinkedIn përshkruhet me vetëm një tagline: “AI for the physical economy”, pa detaje mbi vendndodhjen apo strategjinë.
Megjithatë, kompania duket se ka lëvizur shpejt. Ajo ka punësuar pothuajse 100 specialistë, përfshirë kërkues nga OpenAI, Google DeepMind dhe Meta, një sinjal se projektet që po ndërmerren janë tejet ambicioze.
Sipas burimeve të NYT, Project Prometheus synon të zhvillojë AI të orientuar drejt botës fizike, jo vetëm modele të mëdha gjuhësore. Fushat kryesore të fokusit pritet të jenë:
- robotika,
- projektimi i ilaçeve,
- zbulimet shkencore përmes sistemeve që mësojnë nga ndërveprimi fizik etj,
Kjo e vendos start-up-in në një segment në rritje të inteligjencës artificiale, që shkon përtej modeleve të bazuara vetëm në të dhëna dhe synon krijimin e “trurit digjital” që vepron në botën e vërtetë.
