Nga ndalimet te hetimet: Shtetet që po veprojnë kundër chatbot-it Grok të Elon Musk

Qeveri në mbarë botën kanë nisur masa kundër Grok, chatbot-it të inteligjencës artificiale të Elon Musk, për shkak të shqetësimeve serioze se ai po gjeneron imazhe seksuale të rreme pa pëlqim. Problemi lidhet me krijimin e deepfake-ve, ku fytyra e njerëzve, kryesisht grave, përdoret në përmbajtje eksplicite pa autorizim.

Në Azinë Juglindore, Indonezia ishte vendi i parë që e bllokoi përkohësisht Grok, duke e cilësuar atë si rrezik për gratë, fëmijët dhe sigurinë digjitale. Autoritetet thanë se platforma nuk ka masa të mjaftueshme për të ndaluar krijimin e pornografisë së rreme, çka shkel privatësinë dhe dinjitetin e qytetarëve. Edhe Malajzia vendosi një ndalim të përkohshëm pas rasteve të përsëritura të keqpërdorimit të mjetit për imazhe seksuale pa pëlqim.

Australia ka shprehur shqetësim pas raportimeve në rritje për përmbajtje seksuale të krijuar nga Grok. Autoritetet atje paralajmëruan se mund të kërkojnë heqjen e përmbajtjes problematike nëse ajo shkel ligjet për sigurinë online.

Në Europë, Komisioni Europian po shqyrton raste ku Grok ka gjeneruar imazhe seksuale të vajzave të mitura dhe ka kërkuar që kompania X të ruajë dokumentacionin përkatës. Gjermania po përgatit një ligj të ri kundër dhunës digjitale, ndërsa Mbretëria e Bashkuar ka nisur një hetim zyrtar ndaj X për përdorimin e Grok në krijimin e imazheve seksuale pa pëlqim.

Edhe Italia dhe Franca kanë reaguar ashpër. Autoritetet italiane kanë paralajmëruar për ndjekje penale ndaj kujtdo që përdor AI për të zhveshur njerëz në imazhe, ndërsa prokuroria në Paris ka zgjeruar hetimet ndaj X për të përfshirë edhe Grok. Këto zhvillime tregojnë se presioni ndërkombëtar ndaj përdorimit të pakontrolluar të AI po rritet me shpejtësi.