Qendra Kombëtare e Biznesit po avancon procesin e modernizimit të Regjistrit Tregtar Shqiptar përmes një bashkëpunimi të zgjeruar me InfoCamere, institucionin italian që administron sistemin e regjistrit tregtar dhe shërbimeve digjitale për biznesin në Itali.
Në kuadër të këtij partneriteti, Drejtori i Përgjithshëm i QKB-së, Etugert Llazi, së bashku me përfaqësues të Ministrisë së Ekonomisë dhe Inovacionit dhe drejtues të tjerë të institucionit, zhvilluan një vizitë zyrtare pune në Padova.
Takimet u fokusuan në projektin për reformimin dhe modernizimin e infrastrukturës teknologjike të QKB-së, me synimin për ta afruar regjistrin shqiptar me standardet europiane të digjitalizimit, transparencës dhe ndërveprueshmërisë.
Gjatë workshop-it të organizuar nga InfoCamere, ekspertët italianë dhe delegacioni shqiptar diskutuan implementimin e një sistemi të ri regjistrimi dhe raportimi të bazuar në standardin ndërkombëtar XBRL, si dhe integrimin e tij me sistemet ekzistuese dhe procesin e migrimit të të dhënave drejt platformës së re.
Një pjesë e rëndësishme e diskutimeve iu kushtua përputhshmërisë së sistemit me direktivat e Bashkimit Europian, mbrojtjes së të dhënave personale dhe rritjes së transparencës në funksionimin e regjistrit tregtar.
Po ashtu, palët diskutuan edhe ndërlidhjen me sistemin europian BRIS, i cili synon ndërveprueshmërinë mes regjistrave të biznesit në vendet e BE-së dhe partnerëve të tyre.
Lexo edhe: Shqipëria përballë rregullave të reja të inteligjencës artificiale, a është momenti për një kuadër kombëtar?
Delegacioni shqiptar pati mundësinë të njihej nga afër me modelin italian të regjistrit plotësisht digjital, përdorimin e identifikimit elektronik dhe nënshkrimit elektronik, si edhe standardet e sigurisë kibernetike dhe administrimit të infrastrukturës teknologjike.
Në kuadër të vizitës, përfaqësuesit e QKB-së zhvilluan edhe një tur në Data Center-in e InfoCamere, ku u prezantuan kapacitetet teknologjike dhe mënyra e organizimit operacional që garanton vazhdimësinë e shërbimeve digjitale për bizneset.
Takimet u organizuan në tre sesione të dedikuara për aspektet ligjore dhe rregullatore, çështjet teknike dhe IT, si dhe ndikimin ekonomik që pritet të sjellë reformimi i regjistrit tregtar.
Në përfundim të vizitës, palët diskutuan hapat e ardhshëm të projektit, përfshirë modelin e qeverisjes, institucionet që do të përfshihen dhe fazat e implementimit të sistemit të ri.
Sipas QKB-së, ky bashkëpunim pritet të ndikojë drejtpërdrejt në përmirësimin e shërbimeve ndaj biznesit, rritjen e efikasitetit institucional dhe harmonizimin e mëtejshëm të Shqipërisë me standardet europiane të transformimit digjital.
