Mira Murati hyn zyrtarisht në garën globale me modelin e parë të Thinking Machines Lab

Më shumë se një vit pasi themeloi startup-in Thinking Machines Lab, ish-drejtoresha e teknologjisë së OpenAI, Mira Murati, ka prezantuar modelin e parë të inteligjencës artificiale të kompanisë, duke shënuar hyrjen e saj zyrtare në tregun global të AI.

Modeli i ri, i quajtur Inkling, është ndërtuar për të përpunuar lloje të ndryshme të kërkesave dhe formateve të të dhënave, me synimin për të ofruar një ekuilibër mes performancës dhe kostos së përdorimit.

Një nga karakteristikat kryesore të Inkling është se publikohet si model open-weight, çka u mundëson zhvilluesve ta shkarkojnë dhe ta përshtatin sipas nevojave të tyre, pa pasur akses në kodin burimor ose në të dhënat e përdorura për trajnimin e tij.

Sipas Thinking Machines, Inkling arrin rezultate konkurruese në testimet standarde krahasuar me modele të tjera open-weight, megjithëse kompania pranon se nuk synon të ofrojë modelin më të fuqishëm në treg. Objektivi, sipas saj, është krijimi i një modeli të balancuar, që ofron performancë të qëndrueshme në një gamë të gjerë përdorimesh.

Lexo edhe: New York vendos bllokadën e parë në SHBA për qendrat e reja të të dhënave të AI

Thinking Machines Lab u themelua në fillim të vitit 2025 nga Mira Murati dhe një grup ish-punonjësish të OpenAI. Edhe pa lançuar një produkt, kompania arriti të sigurojë rreth 2 miliardë dollarë financim, duke u vlerësuar në 12 miliardë dollarë, një nga ngritjet më të shpejta në industrinë e inteligjencës artificiale.

Megjithatë, gjatë muajve të fundit disa inxhinierë janë larguar nga kompania për t’iu bashkuar Meta-s dhe OpenAI-t, duke reflektuar konkurrencën e fortë për talentet në këtë sektor.

Inkling në një treg gjithnjë e më konkurrues

Publikimi i Inkling vjen në një kohë kur kompanitë amerikane po përpiqen të rikthejnë konkurrueshmërinë në segmentin e modeleve të hapura të inteligjencës artificiale, ndërsa zhvilluesit kinezë kanë fituar terren me alternativa falas dhe me performancë të lartë.

Ndërkohë, kompani si Meta dhe OpenAI kanë orientuar një pjesë të strategjisë së tyre drejt modeleve komerciale, duke lënë më pak alternativa open-weight në tregun amerikan.

Rritja e kostove të përdorimit të AI po shtyn gjithnjë e më shumë biznese dhe zhvillues të kërkojnë modele më ekonomike, një prirje që po rrit interesin për zgjidhjet me peshë të hapur.

Inkling nuk do të jetë burim të ardhurash

Thinking Machines nuk synon të gjenerojë të ardhura drejtpërdrejt nga Inkling. Aktualisht, kompania fiton përmes platformës Tinker, e cila u mundëson klientëve të personalizojnë modele të inteligjencës artificiale për nevoja specifike. Mes klientëve të saj përmendet edhe fondi i investimeve Bridgewater Associates.

Për Muratin, Inkling përfaqëson vetëm hapin e parë drejt një objektivi më ambicioz: zhvillimin e modeleve që bashkëpunojnë me njerëzit në mënyrë më natyrale, duke kuptuar jo vetëm tekstin apo zërin, por edhe elementë të komunikimit si ritmi i bisedës, pauzat, ndërprerjet dhe sinjalet e tjera që karakterizojnë ndërveprimin njerëzor.

Me lançimin e produktit të saj të parë, Thinking Machines Lab hyn zyrtarisht në garën mes laboratorëve më të rëndësishëm të inteligjencës artificiale, në një periudhë kur konkurrenca globale në këtë sektor po intensifikohet.

fortune.com