Videot e shkurtra dhe përmbajtja vizuale po ndikojnë gjithnjë e më shumë në mënyrën se si udhëtarët zgjedhin destinacionet, aktivitetet dhe përvojat e pushimeve. Për Gen Z, TikTok tashmë është bërë një nga burimet kryesore të frymëzimit për udhëtime.
Një studim i kryer nga TUI Musement në Spanjë, Itali dhe Mbretërinë e Bashkuar tregon se 48% e të anketuarve të Gen Z, të lindur mes viteve 1997 dhe 2012, thonë se TikTok ndikon në zgjedhjen e destinacioneve të udhëtimit. Platforma renditet kështu përpara rekomandimeve nga familjarët dhe miqtë, të cilat u përmendën nga 43% e të anketuarve.
Të dhënat tregojnë se ndikimi i rrjeteve sociale nuk kufizohet vetëm te frymëzimi. Në total, 43% e udhëtarëve deklaruan se një postim ose video virale i ka shtyrë të rezervojnë një udhëtim ose të marrin pjesë në një aktivitet. Përqindja është edhe më e lartë te millennials, me 52%, ndërsa te Gen Z arrin në 50%.
Lexo edhe: A ia vlen të blesh ndjekës (followers) në Instagram dhe TikTok?
Edhe krijuesit e përmbajtjes kanë një rol të rëndësishëm në vendimmarrje. 43% e të anketuarve thanë se influencuesit që ndjekin ndikojnë në zgjedhjen e destinacioneve dhe aktiviteteve, ndërsa 27% deklaruan se kanë ndryshuar destinacionin e udhëtimit për shkak të rekomandimit të një influencuesi.
“Një imazh ose video e vetme tashmë mund të frymëzojë një udhëtim”, tha Mirco Fiumene, drejtor menaxhues dhe CMO i TUI Musement, duke theksuar se kompania po rrit fokusin te platformat si Instagram dhe TikTok për të komunikuar me audiencën.
Por ndikimi i rrjeteve sociale vazhdon edhe pasi udhëtari ka mbërritur në destinacion. Sipas studimit, 37% e udhëtarëve ndiejnë presionin për t’i paraqitur pushimet e tyre si më emocionuese në rrjetet sociale. Te Gen Z, kjo shifër rritet në 45%.
Përmbajtja për rrjetet sociale po ndikon edhe në aktivitetet që zgjedhin turistët. Rreth 39% e të anketuarve thanë se kanë vizituar një pikë turistike kryesisht për të bërë një foto ose video. Ndërsa 37% deklaruan se, të paktën herë pas here, preferojnë vendet e famshme në Instagram ndaj atraksioneve më pak të njohura.
Lexo edhe: Ylli i TikTok shet fytyrën, zërin dhe markën e tij për 975 milionë dollarë
Të dhënat sugjerojnë një ndryshim të rëndësishëm në industrinë e turizmit: destinacionet nuk konkurrojnë më vetëm për cilësinë e përvojës që ofrojnë, por edhe për mënyrën se si ajo përvojë përkthehet në përmbajtje digjitale.
Për një brez që zbulon botën përmes algoritmeve, pyetja po ndryshon nga “Ku do të shkoj?” në “Çfarë pashë në TikTok që dua ta përjetoj edhe unë?”.
