Google prezanton Pics, mjetin AI që e kthen një prompt në dizajn

Google po hyn më seriozisht në tregun e dizajnit kreativ me një mjet të ri për krijimin dhe përpunimin e imazheve të quajtur Google Pics. Platforma do të bëhet pjesë e paketës Google Workspace dhe do të jetë e disponueshme për klientët biznes, si edhe për abonentët premium të Google AI.

Sipas kompanisë, Google Pics mbështetet në modelin e gjenerimit të imazheve Nano Banana dhe pritet të bëhet gradualisht i disponueshëm gjatë javëve të ardhshme për shumicën e përdoruesve të Workspace, si edhe për abonentët e Google AI Pro dhe Ultra. Në pamje të parë, Google Pics hyn në të njëjtën kategori me platforma të njohura si Canva dhe Adobe Express. Ai synon të ndihmojë përdoruesit në realizimin e detyrave të përditshme të dizajnit, si krijimi i posterave, postimeve për rrjetet sociale, ilustrimeve dhe materialeve të tjera vizuale që nevojiten në punë apo për përdorim personal.

Por Google po e ndërton produktin mbi një filozofi disi ndryshe. Në Canva, për shembull, përdoruesit punojnë me një ekosistem të gjerë templatesh, fotografish, grafikash dhe materialesh të krijuara nga dizajnerë, ilustratorë dhe fotografë. Adobe Express, nga ana tjetër, ofron mjete që u mundësojnë krijuesve të ndërtojnë dhe modifikojnë vetë përmbajtjen vizuale. Me Google Pics, ideja është shumë më e orientuar drejt inteligjencës artificiale: në vend që të dizajnosh, ti i tregon AI-së se çfarë dëshiron. Pra, procesi nis nga një prompt.

Lexo edhe: Google dhe Dua Lipa sjellin zyrtarisht Kosovën në “Street View”

Përdoruesi përshkruan vizualin që dëshiron të krijojë dhe inteligjenca artificiale gjeneron alternativa të ndryshme. Në këtë mënyrë, Google po përpiqet ta zhvendosë procesin e krijimit nga përdorimi manual i mjeteve të dizajnit drejt një bashkëbisedimi me AI-në. Google Pics nuk kufizohet vetëm te gjenerimi i imazheve. Platforma përfshin edhe funksione editimi që mundësojnë izolimin dhe transformimin e objekteve brenda një imazhi, modifikimin apo përkthimin e tekstit që ndodhet në imazh dhe ndryshime të tjera vizuale. Një tjetër element i rëndësishëm është bashkëpunimi. Ashtu si në produktet e tjera të Google Workspace, disa përdorues mund të punojnë së bashku mbi të njëjtin material. Gjithashtu, sistemi mund të krijojë disa versione të ndryshme të së njëjtës kërkesë, duke i dhënë përdoruesit mundësinë të zgjedhë rezultatin që i përshtatet më mirë.

Integrimi me ekosistemin e Google mund të jetë një nga avantazhet më të mëdha të produktit. Google Pics do të ndërtohet direkt brenda Google Workspace, duke nisur fillimisht me Google Docs dhe Google Slides, ndërsa më vonë pritet të integrohet edhe me Google Drive. Kjo do të thotë se një përdorues që po përgatit një prezantim, raport apo dokument pune mund të krijojë një vizual me AI pa pasur nevojë të largohet nga mjedisi ku po punon. Hyrja e Google në këtë segment e bën edhe më interesante konkurrencën në tregun e mjeteve kreative. Canva dhe Adobe prej kohësh po integrojnë funksione të inteligjencës artificiale në platformat e tyre, ndërsa Google po e nis nga një premisë tjetër: AI nuk është thjesht një funksion shtesë i programit të dizajnit, por vetë mënyra se si krijohet dizajni.

Nëse kjo qasje funksionon, Google Pics mund ta bëjë krijimin e përmbajtjes vizuale shumë më të aksesueshëm për njerëzit që nuk kanë eksperiencë në dizajn. Dhe ndoshta këtu qëndron edhe ndryshimi më interesant që AI po sjell në industrinë kreative: pyetja mund të mos jetë më “A di të dizajnosh?”, por “A di t’i shpjegosh AI-së atë që ke në mendje?”