Gjiganti teknologjik Google ka bashkuar forcat me yllin botëror të muzikës pop, Dua Lipa, për të lançuar opsionin “Street View” në Kosovë, duke u mundësuar përdoruesve nga e gjithë bota të eksplorojnë rrugët e vendit virtualisht.
Përmes një postimi të përbashkët në rrjetet sociale, Google dhe Dua Lipa njoftuan se Kosova është tashmë zyrtarisht e qasshme në platformën e njohur të hartave. Në kuadër të këtij bashkëpunimi, këngëtarja me origjinë shqiptare ka bashkëpunuar edhe me platformën e saj Service95 për të krijuar një guidë personale me rekomandimet e saj kryesore për kryeqytetin, Prishtinën.
Një shëtitje virtuale nëpër Prishtinë me Dua Lipën
Ata që do të përdorin “Street View” për të lundruar në rrugët e Prishtinës do të kenë mundësi të zbulojnë vendet e preferuara të Dua Lipës — nga lokalet dhe hapësirat e saj të preferuara për t’u shoqëruar, e deri te pikat më ikonike kulturore e historike të qytetit.
“Mendojeni këtë si turin tuaj personal në shtëpinë e Dua Lipës. Kosova është zyrtarisht live në Street View! Jemi partnerizuar me Duan dhe Service95 për të ndarë rekomandimet e saj që duhen parë patjetër në Prishtinë, nga vendet e preferuara lokale deri te pikat kryesore të qytetit,” thuhet në njoftimin zyrtar të Google.
Një hap i rëndësishëm për promovimin e Kosovës në botë
Përfshirja e Kosovës në Google Street View jo vetëm që lehtëson navigimin për qytetarët dhe turistët, por përbën edhe një arritje të madhe për promovimin e turizmit dhe imazhit të vendit në nivel global. Përmes zërit dhe ndikimit të Dua Lipës, bukuritë dhe kultura e Prishtinës do të arrijnë te miliona ndjekës në mbarë botën.
Përdoruesit mund të vizitojnë vegëzën (linkun) në profilin zyrtar për të nisur eksplorimin e listave dhe vendeve të rekomanduara.
1 Comment
Pingback: Google prezanton Pics, mjetin AI që e kthen një prompt në dizajn - Technews.al