Artisti i njohur kinez Ai Weiwei, 69 vjeç, ka ngritur shqetësimin për ndikimin e inteligjencës artificiale në privatësinë dhe lirinë e njeriut. Gjatë një diskutimi në qendrën kulturore Bozar në Bruksel, përpara më shumë se 2,000 pjesëmarrësve, ai paralajmëroi se teknologjia mund të përdoret për të kontrolluar shoqërinë dhe për të kufizuar mendimin e lirë.
“Ndoshta është tepër vonë për t’i shmangur rreziqet. Nuk kemi më privatësi dhe kur individët nuk kanë privatësi, ata pushojnë së qeni individë dhe shndërrohen në produktin e përsosur”, u shpreh Ai Weiwei, gjatë prezantimit të librit të tij të ri Ai Weiwei on Censorship.
Sipas artistit, një nga rreziqet më të mëdha në demokracitë perëndimore është autocensura, kur njerëzit shmangin shprehjen e mendimeve nga frika e pasojave. Ai argumenton se autoritetet dhe normat shoqërore ndikojnë në përcaktimin e asaj që konsiderohet e pranueshme, duke kufizuar në mënyrë indirekte lirinë e shprehjes.
Ai Weiwei, i njohur për veprat e tij artistike dhe kritikat ndaj qeverisë kineze, ka përjetuar arrestime, dhunë dhe kufizime të lirisë për shkak të aktivizmit të tij. Sot, duke jetuar në Portugali, ai vazhdon të mbrojë idenë se privatësia, liria e mendimit dhe e drejta për të qenë ndryshe janë thelbësore për ruajtjen e individualitetit njerëzor.
