Roboti Besa jo vetëm që komunikon rrjedhshëm në shqip, por edhe kryen detyra të avancuara si hartimi i pyetjeve gazetareske, duke treguar potencialin e tij si një bashkëpunëtor i zgjuar në mjediset profesionale dhe personale.
Krijuesi i këtij roboti inovativ është Artit Muhaxhiri, një sipërmarrës dhe ekspert i teknologjisë i lindur në Gjermani dhe rritur në Kosovë. Me një rrugëtim që përfshin ndërtimin e bizneseve online, zhvillimin e aplikacioneve dhe krijimin e kryptovalutës “KosovaCoin”, Muhaxhiri e pati gjithmonë si qëllim që teknologjia më e re t’i shërbente edhe komunitetit shqiptar.
Roboti Besa, i disponueshëm për përdoruesit e iPhone, Android dhe kompjuter, është shprehje e kësaj dëshire për të thyer barrierat gjuhësore dhe për të fuqizuar bashkëkombësit përmes inovacionit.
Duke parë përpara, Artit Muhaxhiri synon që Besa të zgjerohet me funksione të reja si krijimi i videove, analizimi i dokumenteve dhe ndoshta një ditë edhe në formën e një roboti fizik. Përmes këtij projekti, ai shpreson të ndikojë në edukim, biznes dhe promovimin global të kulturës shqiptare, duke e bërë teknologjinë më të arritshme, më të afërt dhe më të ndjeshme ndaj trashëgimisë sonë kulturore./BusinessMag
