Sapo u lançua Nintendo Switch 2, ja çfarë duhet të dini (FOTO)

Pas tetë vitesh nga prezantimi i Switch-it të parë, Nintendo ka sjellë më në fund pasardhësin e tij: Switch 2. Konsola e re është hedhur në treg sot në të gjithë botën dhe ka ngjallur interes të jashtëzakonshëm mes fansave. Vetëm në Japoni, 2.2 milionë persona aplikuan përmes shortit për të siguruar një njësi, ndërsa në SHBA, shumë dyqane hapën dyert në mesnatë për t’i shërbyer klientëve të zjarrtë.

Switch 2 kushton 450 dollarë dhe ndjek të njëjtën formulë si paraardhësi: mund të luhet në dorë, mbi tavolinë ose në TV kur lidhet me dokun. Megjithatë, përveç kësaj fleksibiliteti të njohur, Nintendo ka përmirësuar ndjeshëm pajisjen me një ekran më të madh, kontrollorë Joy-Con të avancuar dhe funksione të reja sociale.

Një nga risitë më të mëdha është funksioni “Game Chat”, që lejon deri në 12 lojtarë të flasin dhe ndajnë ekranin në kohë reale. Për më tepër, edhe nëse një lojtar nuk e zotëron një lojë të caktuar, ai mund të bashkohet në lojë përmes një lidhjeje të përbashkët, kur ndodhen fizikisht pranë njëri-tjetrit. Disa nga këto funksione kërkojnë pajisje shtesë si kamera e Nintendo, që shitet veçmas për 55 dollarë.

Joy-Con-ët e rinj përfshijnë veçori që i ngjajnë përdorimit të mausit në kompjuter. Kjo hap mundësi për lojëra si “Drag x Drive”, ku lojtarët kontrollojnë personazhe që lëvizin me karroca elektrike për të shënuar në fushë basketbolli. Në lojën “Metroid Prime 4: Beyond”, këto kontrolle lejojnë një saktësi më të madhe në shënjestër.

Në aspektin teknik, Switch 2 sjell një ekran 7.9-inç, memorje të brendshme tetë herë më të madhe dhe mbështetje për rezolucion 4K përmes dokut. Kontrollorët tani lidhen magnetikisht, duke e bërë më të lehtë përdorimin. Nintendo e justifikon çmimin më të lartë me këto përmirësime, duke e konsideruar si një vlerë të drejtë për konsumatorin.

Lexo edhe: GTA 6 sjell një revolucion grafik, ja diferencat dramatike nga GTA 5 (FOTO)

Sa i përket lojërave, Switch 2 lancohet me “Mario Kart World”, ndërsa gjatë vitit do të shtohen tituj si “Donkey Kong Bonanza”, “Kirby Air Riders” dhe “Hyrule Warriors: Age of Imprisonment”. Konsola është gjithashtu e përshtatshme për shumë nga lojërat e Switch-it të parë, edhe pse disa mund të mos jenë plotësisht të mbështetura. Modele më të lira si Switch Lite dhe Switch OLED vazhdojnë të jenë në shitje, duke ofruar alternativa për ata që nuk duan të shpenzojnë 450 dollarë, por edhe duke krijuar sfida për suksesin e menjëhershëm të modelit të ri./CNN