Qeveria hedh për konsultim ‘Strategjinë Kombëtare të Inteligjencës Artificiale’, ja fushat prioritare

Agjencia Kombëtare e Shoqërisë së Informacionit ka hapur ditën e djeshme procesin e konsultimit publik për projektvendimin “Për miratimin e Strategjisë Kombëtare të Inteligjencës Artificiale të Shqipërisë 2025-2030 dhe të Planit të Veprimit”. Dokumenti i cili është i aksesueshëm për çdo qytetar do të mirëpres komente, sugjerime dhe vërejtje për 20 ditë nga shpallja e tij publike.

Sipas dokumentit, aplikimet e inteligjencës artificiale parashikohen që nga bujqësia me sisteme inteligjente ujitjeje, te shëndetësia me diagnostikim të hershëm, e deri tek administrata publike me shërbime të personalizuara për qytetarët.

Strategjia parashikon pesë shtylla kryesore: zhvillimin e kapaciteteve të nivelit botëror në IA përmes ekspertëve vendas dhe startup-eve; integrimin e teknologjisë në sektorë si qeverisja, arsimi, shëndetësia, bujqësia dhe turizmi; krijimin e infrastrukturës së qëndrueshme digjitale; sigurimin e përdorimit etik dhe gjithëpërfshirës të IA-së; si dhe ndërtimin e një ekonomie bashkëpunuese ku qeveria, biznesi dhe akademia bashkohen për inovacion.

Dokumenti është në përputhje me strategjitë kombëtare të zhvillimit dhe integrimit evropian, Agjendën Digjitale 2022–2026, planin e rritjes për Ballkanin Perëndimor, strategjitë sektoriale për shëndetësinë, arsimin, punësimin, shkencën dhe sigurinë kibernetike. Ligji nr. 43/2023 “Për Qeverisjen Elektronike” vendos bazën ligjore për integrimin e AI-së në administratën publike, ndërsa standardet teknike të vitit 2024 garantojnë përdorim të sigurt dhe etik.

Lexo edhe: Qeveria shqiptare do të japë 10 milionë dollarë për startup-in e Mira Muratit

Përveç objektivave të brendshme, Shqipëria synon të bëhet pjesë aktive e bashkëpunimeve ndërkombëtare për inteligjencën artificiale, të tërheqë investime dhe të presë qendra kërkimore të profilit të lartë.

Sipas qeverisë, ky vizion është i lidhur ngushtë me aspiratën për anëtarësim në Bashkimin Evropian dhe zhvillimin e qëndrueshëm ekonomik. “AI është një mundësues kyç për të arritur standardet evropiane dhe për të modernizuar shërbimet publike, duke rritur cilësinë e jetës për çdo qytetar, si në zonat urbane ashtu edhe në ato rurale,” thuhet në strategji.