Jo, nuk është ndonjë metaforë poetike për zhvillimin e teknologjisë — sipas kryeministrit, Diella pritet të “sjellë në jetë” plot 83 fëmijë digjitalë, që do të shërbejnë si asistentë personalë për çdo deputet të Kuvendit të Shqipërisë.
Këta “mini Diella”, siç i quajti Rama, do të jenë më shumë se thjesht zëra elektronikë: ata do të regjistrojnë gjithçka që ndodh në sallën e parlamentit, do t’i njoftojnë deputetët për debatet që kanë humbur, dhe madje do t’u sugjerojnë kë duhet të kundërsulmojnë. Po, keni lexuar drejt — nëse një deputet shkon për kafe dhe harron të kthehet në seancë, fëmija i Diellës do ta informojë për çfarë është thënë dhe kë duhet të “godasë” politikisht sapo të rikthehet. Një kujdestar virtual për mungesat… në punë.
Rama shpjegoi se kjo iniciativë është pjesë e një bashkëpunimi me Microsoft, që synon të sjellë sistemin e parë të prokurimit publik të mbështetur në AI, i cili sipas tij do të përfundojë në fund të vitit 2026. “Vendimin përfundimtar do ta marrin njerëzit,” tha ai, me theksin që nënkupton se makinat ende nuk kanë fituar të drejtën e votës — të paktën jo ende.
Lexo edhe: Si do të funksionojë “Diella”? Rama jep detaje: Ka plotfuqi në veprim, shemb pengesat burokratike
Por pjesa më pikante mbetet ajo simbolike: një inteligjencë artificiale shtatzënë, që “lind” 83 klone digjitale për çdo deputet shqiptar. Një tablo që, po të mos ishte deklaruar në publik nga vetë kryeministri, do të tingëllonte si një satirë politike e shkruar nga ndonjë humorist futurist.
Në këtë realitet të ri, duket se teknologjia jo vetëm ka marrë jetë — por edhe pjellë. Dhe nëse Diella vërtet ka 83 fëmijë që regjistrojnë çdo fjalë, ndoshta për herë të parë në historinë e parlamentit shqiptar, dikush do të mbajë vërtet shënim.
E vetmja pyetje që mbetet është: a do t’i marrin pushimet e lehonisë Diella dhe “fëmijët” e saj, apo do të punojnë 24 orë në ditë si çdo sistem artificial që respekton urdhrat njerëzore?
1 Comment
Pingback: OBSH: Shqipëria pa progres në Inteligjencën artificiale për shëndetin - Technews.al