Autoritetet në Seul kanë zbuluar se disa produkte të kompanive Shein, Temu dhe AliExpress përmbajnë kimikate të rrezikshme, në disa raste qindra herë mbi nivelin e lejuar. Kontrolli, i kryer më 14 gusht, testoi 144 produkte nga këto platforma dhe konstatoi se disa prej tyre nuk përmbushnin standardet e sigurisë. Popullariteti global i këtyre faqeve, që ofrojnë veshje dhe aksesorë me çmime shumë të ulëta, ka sjellë shqetësime të reja për cilësinë dhe sigurinë e produkteve të tyre.
Testet treguan se këpucët nga Shein përmbanin nivele jashtëzakonisht të larta të ftalatëve – substanca që përdoren për të zbutur plastikën – me një palë që kishte 229 herë më shumë se kufiri ligjor. Gjithashtu, kapelat e Shein përmbanin formaldehid në sasi dy herë më të lartë se sa lejohet, ndërsa dy shishe manikyri kishin përmbajtje të dioxanit – një substancë kancerogjene që dëmton mëlçinë – më shumë se 3.6 herë mbi normën. Shein deklaroi për AFP se bashkëpunon me agjenci ndërkombëtare për testime të pavarura dhe se furnitorët e tyre janë të detyruar të respektojnë standardet e sigurisë.
Në ndërkohë, sandale të markës Temu rezultuan me nivele të larta plumbi në shtresën e brendshme – 11 herë mbi kufirin e lejuar. Temu reagoi duke thënë se ka nisur menjëherë një hetim të brendshëm dhe ka hequr produktet problematike nga platforma e saj, duke premtuar forcim të kontrolleve të cilësisë. Autoritetet në Seul paralajmëruan qytetarët që të jenë të kujdesshëm, pasi produktet që kanë kontakt direkt me trupin mund të përbëjnë rrezik të lartë për shëndetin.
Lexo edhe: Shein akuzohet për shkelje të ligjit të BE-së me taktika manipuluese shitjesh
Zyrtarja e qeverisë, Kim Tae-hee, theksoi se kontrollet do të vazhdojnë në mënyrë të rregullt dhe rezultatet do të publikohen publikisht për transparencë. Ndërkohë, në prill të këtij viti, Bashkimi Evropian e përfshiu Shein në listën e kompanive digjitale që i nënshtrohen rregullave më të ashpra të sigurisë, për të mbrojtur konsumatorët – veçanërisht të miturit – nga produktet e pasigurta dhe të dëmshme.
