Korea e Jugut ka njoftuar se duke filluar nga viti i ardhshëm, çdo reklamë e bërë me inteligjencë artificiale (AI) duhet të jetë e shënuar qartë si e tillë. Qeveria thotë se reklamat mashtruese me “ekspertë të rremë” ose “deepfake” të të famshmëve po shtohen në rrjetet sociale dhe po mashtrojnë qytetarët, sidomos të moshuarit.
Pas një mbledhjeje të udhëhequr nga Kryeministri Kim Min-seok, autoritetet thanë se do të forcojnë kontrollin dhe heqjen e reklamave të rrezikshme dhe do të vendosin gjoba më të ashpra. Sipas tyre, shumë reklama të krijuara me AI po prishin “rendin e tregut”.
Zyrtarët theksojnë se kushdo që krijon apo publikon foto ose video të gjeneruara nga AI, duhet t’i etiketojë ato. Platformat online nuk do të lejohen t’i heqin ose t’i manipulojnë këto etiketa. Ligjet për telekomunikacionin pritet të ndryshohen që rregullat e reja të hyjnë në fuqi në fillim të vitit 2026.
Problemi i reklamave të rreme po rritet me shpejtësi. Vetëm këtë vit, Ministria e Ushqimit dhe Barnave ka identifikuar më shumë se 96,700 reklama të paligjshme online. Ato përfshijnë produkte ushqimore, kozmetikë, suplemente, por edhe kumar të paligjshëm.
Lexo edhe: Foto të pabesueshme nga afër të flokëve të dëborës zbulojnë një anë të dimrit që nuk e keni parë kurrë
Krahas reklamave, vendi po përballet edhe me raste abuzimi seksual përmes AI. Muajin e kaluar një burrë u dënua me burgim të përjetshëm për shantazh dhe përdorim të imazheve të manipuluara ndaj më shumë se 200 viktimave.
Qeveria planifikon të rrisë gjobat dhe të vendosë dënime më të rënda për ata që shpërndajnë reklama të rreme me AI. Ata mund të paguajnë deri në pesëfishin e dëmit të shkaktuar.
Megjithë rreziqet, Korea e Jugut vazhdon të investojë fort në AI. Kryeministri Kim tha se vendi duhet të zvogëlojë efektet negative të teknologjive të reja, ndërsa shteti po punon për të forcuar industrinë e çipeve kompjuterike që fuqizojnë AI-në. Kompanitë koreane Samsung dhe SK Hynix kontrollojnë mbi 65% të tregut global të çipeve të memories.
