Turistët që duan të udhëtojnë drejt Shteteve të Bashkuara mund të detyrohen të deklarojnë aktivitetin e tyre në rrjetet sociale për pesë vitet e fundit, sipas një plani të ri të administratës Trump. Masa do të zbatohej për shtetasit e 42 vendeve që aktualisht hyjnë në SHBA pa vizë, përfshirë Britaninë e Madhe, Francën, Gjermaninë, Australinë dhe Japoninë.
Sipas njoftimit të publikuar nga Doganat dhe Mbrojtja Kufitare e SHBA (CBP), aplikantët do të duhet të japin gjithashtu numrat e telefonit të përdorur gjatë pesë viteve të fundit dhe adresat e email-it të përdorura në 10 vitet e fundit. Përveç kësaj, do të kërkohen të dhëna biometrike si fotografia e fytyrës, shenjat e gishtërinjve, irisi i syrit dhe madje edhe ADN-ja.
Autoritetet amerikane do të kërkojnë edhe informacione personale për familjarët, përfshirë emra, adresa, data dhe vendlindje, madje edhe për fëmijët. Ndryshimet do të bëhen pjesë e sistemit elektronik të autorizimit të udhëtimit (ESTA) dhe, sipas CBP, janë në përputhje me një urdhër ekzekutiv të firmosur nga Donald Trump në ditën e parë të mandatit të tij të ri.
Plani synon, sipas administratës, të sigurojë që vizitorët “të mos kenë qëndrime armiqësore ndaj qytetarëve, kulturës dhe institucioneve amerikane”. Megjithatë, kjo pritet të vështirësojë udhëtimet, sidomos në prag të Kupës së Botës 2026, të cilën SHBA do ta organizojë bashkë me Kanadanë dhe Meksikën, me miliona tifozë të pritur.
Lexo edhe: Nëse keni folur kundër Charlie Kirk në rrjet, rrezikoni të bëheni non grata në SHBA, ja vendimi
Ndërkohë, turizmi në SHBA ka pësuar rënie të ndjeshme. Shtete si Kalifornia parashikojnë ulje të vizitave të huaja, ndërsa qytete si Los Angeles dhe Las Vegas raportojnë rënie të madhe të numrit të vizitorëve. Edhe udhëtimet nga Kanadaja drejt SHBA-së kanë rënë ndjeshëm gjatë vitit 2025.
Administrata Trump ka shtrënguar gjithashtu politikat për viza, duke kontrolluar qëndrimet politike në rrjetet sociale, duke vendosur tarifa të reja dhe duke shtuar kontrollet në kufi. CBP ka të drejtë të kontrollojë pajisjet elektronike të udhëtarëve dhe, nëse ata refuzojnë, mund t’u mohohet hyrja në vend.
