Një student i dizajnit në Britani ka thyer tabu në botën e pajisjeve shtëpiake me një zbulim që kombinon thjeshtësinë, inovacionin dhe qëndrueshmërinë. Gabriel Kay, i diplomuar në De Montfort University në Leicester, ka krijuar ‘Osiris’, një çajnik modular që mund të riparohet nga çdokush me një çelës thjesht.
I frymëzuar nga idetë e ‘Fairphone’ për pajisje që riparohen, Kay ka vendosur t’i japë një rifreskim kulturës së konsumit për pajisjet e përditshme. Çajniku i tij ka pjesë të shkëputshme që mund të zëvendësohen lehtësisht, duke i dhënë përdoruesve besimin se mund të kryejnë mirëmbajtjen e tyre pa frikë nga elektronika e ndërlikuar.
“Shumë nga pajisjet shkojnë direkt në plehra pa nevojë. Qëllimi im ishte t’i bëja njerëzit të ndiheshin komod me procesin e riparimit,” thotë Kay. Ideja e tij vjen në një kohë kur mbeturinat elektronike tejkalojnë përpjekjet për riciklim me një raport 5 me 1. Sipas OKB-së, çdo vit prodhohen 62 milion ton mbetje elektronike, ku pajisjet e vogla shtëpiake, përfshirë çajnikët dhe tostierët, përbëjnë një të tretën.
Lexo edhe: Studentët holandezë shpikin makinën elektrike që e riparon vetë, pa mekanik
Çajniku ‘Osiris’ nuk është vetëm një pajisje inovative – ai është një mesazh i qartë për të krijuar produkte që zgjatin dhe që mund të mirëmbahen, duke reduktuar ndotjen dhe mbetjet. Projekti i Gabrielit është tashmë i vlerësuar në nivele të ndryshme dhe pritet të frymëzojë një brez të ri dizajnerësh të fokusuar te qëndrueshmëria dhe riparimi.
