Të hapësh një llogari bankare, të transferosh para apo të menaxhosh kursimet pa shkuar asnjëherë në bankë. Ky është modeli i bankave digjitale, të cilat ofrojnë shërbime financiare kryesisht përmes aplikacioneve në telefon, pa pasur nevojë për një rrjet tradicional degësh fizike.
Bankat digjitale funksionojnë në mënyrë të ngjashme me bankat tradicionale. Ato mund të ofrojnë llogari, karta, depozita, transferta dhe produkte të tjera financiare, por shumica e veprimeve kryhen online. Mungesa e degëve fizike mund të ulë kostot dhe të përshpejtojë shërbimet, ndërsa siguria e parave varet nga licencimi, mbikëqyrja dhe masat e mbrojtjes së institucionit.
Po në Shqipëri?
Në mars 2026, Banka e Shqipërisë licencoi Jet Bank, bankën e parë plotësisht digjitale në vend. Në korrik, ajo nisi aktivitetin dhe aplikacionin e saj, duke ofruar hapjen e llogarive, depozita, karta debiti fizike dhe virtuale, si dhe këmbim valutor.
Ndërkohë, edhe bankat tradicionale në Shqipëri ofrojnë shërbime përmes aplikacioneve, si kontrolli i llogarive, pagesat dhe transfertat. Megjithatë, një bankë tradicionale me aplikacion nuk është domosdoshmërisht e njëjtë me një bankë 100% digjitale.
Lexo edhe: Krizë bankare në Paraguaj: 3 milionë klientë pa akses në paratë e tyre, dorëhiqet presidenti
Cili është rreziku?
Edhe pse bankat digjitale ofrojnë shërbime të shpejta dhe praktike, ato nuk janë të mbrojtura nga problemet financiare, sulmet kibernetike apo falimentimi. Një rast shqetësues është ai i Ueno Bank në Paraguaj, ku, sipas raportimeve, ndërhyrja e autoriteteve për shkak të problemeve me aftësinë paguese la rreth 3 milionë klientë pa akses në shërbimet bankare, ndërsa rreth 380 milionë dollarë investime të fondeve të pensioneve u raportuan si të rrezikuara.
Rasti tregon se një aplikacion modern dhe shërbime të shpejta nuk garantojnë automatikisht sigurinë e kursimeve. Për këtë arsye, është e rëndësishme që qytetarët të kontrollojnë licencimin, gjendjen financiare dhe mbulimin nga skema e sigurimit të depozitave përpara se t’i besojnë paratë një banke.
