Aktori i njohur hollivudian Russell Crowe do të shfaqet në një rol të pazakontë në filmin e tij më të ri, “The Get Out”, ku interpreton një personazh shqiptar me emrin Manko Kapaku. Filmi pritet të dalë në kinematë Cineplexx duke nisur nga 6 gushti, ndërsa lajmi ka ngjallur menjëherë diskutime të shumta në rrjetet sociale.
Në vend të entuziazmit, një pjesë e madhe e komentuesve janë shprehur skeptikë për mënyrën se si shqiptarët përfaqësohen në produksionet ndërkombëtare. Një nga komentet më të pëlqyera shkruan: “A duhet të gëzojmë kur bëhet fjalë për një personazh negativ filmash, gjë që baltos imazhin e Shqipërisë dhe të shqiptarëve në mbarë botën?”
Lexo edhe: “Go Albania!” – Bota mbështet protestuesit shqiptarë ndërsa mediat e huaja raportojnë protesat e fundit
Të tjerë kanë ngritur pyetjen pse producentët nuk zgjodhën një aktor shqiptar për këtë rol. “There’s lots of Albanians they could have hired for this movie,” shkruan një komentues, duke theksuar se industria shqiptare ka aktorë të aftë që mund ta interpretonin personazhin në mënyrë autentike.
Nuk kanë munguar as komentet ironike. Një përdorues shkruan: “Sikur të kishte marrë rolin e Skënderbeut s’do ishte keq,” duke nënkuptuar se do të ishte më e dëshirueshme të shihte një figurë pozitive historike shqiptare në ekranin e madh sesa një personazh me ngjyrime negative.
Debati rikthen edhe një herë në vëmendje mënyrën se si portretizohen shqiptarët në kinemanë ndërkombëtare. Prej vitesh, në shumë filma dhe seriale ata janë paraqitur si pjesë e botës së krimit ose si antagonistë, ndërsa rrallëherë kanë qenë protagonistë me role pozitive ose histori që pasqyrojnë kulturën dhe identitetin e vendit.
Mbetet për t’u parë nëse Manko Kapaku do të jetë vërtet një personazh negativ apo nëse reagimet paraprake janë nxituar. Megjithatë, diskutimi në rrjet tregon se publiku shqiptar është gjithnjë e më i ndjeshëm ndaj mënyrës se si përfaqësohet identiteti i tij në prodhimet e mëdha të Hollivudit.
