“Go Albania!” – Bota mbështet protestuesit shqiptarë ndërsa mediat e huaja raportojnë protesat e fundit

Protestat që prej më shumë se tre javësh po zhvillohen në Shqipëri kanë nisur të tërheqin vëmendjen edhe të mediave ndërkombëtare. Gazeta dhe televizione të njohura si The New York Times, Fox News, The Guardian dhe media të tjera kanë raportuar mbi zhvillimet, duke e sjellë situatën shqiptare në vëmendjen e publikut global.

Paralelisht me raportimet mediatike, rrjetet sociale janë mbushur me komente nga përdorues të huaj që shprehin mbështetje për protestuesit. Nën videot që janë bërë virale në platforma si X, Instagram dhe TikTok, shumë prej tyre vlerësojnë këmbënguljen e qytetarëve shqiptarë pas 23 ditësh protestash të pandërprera.

“The whole world needs to learn from this brave people. Go Albania!”, shkruan një përdorues. Një tjetër komenton: “The whole world needs a Flamingo Revolution 🦩”, ndërsa mesazhe si “We stand with Albania 🇦🇱” apo “I guess there are STILL people money can’t buy. 👏” janë shpërndarë mijëra herë, duke reflektuar solidaritet me protestuesit.

Në diskutimet online nuk mungojnë as komentet politike. Disa përdorues shkruajnë se protesta lidhet me “një politikan që nuk dëgjon vullnetin e popullit”, ndërsa të tjerë kritikojnë faktin që mediat ndërkombëtare, sipas tyre, kanë reaguar me vonesë. “Është qesharake që kjo protestë vazhdon prej javësh dhe vetëm tani po e mbulon New York Times”, shkruan një komentues. Ka edhe reagime më të forta që kërkojnë ndryshime politike, si komenti: “Albanians should overthrow this dictator and kick him out of power.”

Lexo edhe: Protesta e GenZ: Si rrjetet sociale po i japin zë zemërimit të të rinjve kundër shitjes së Shqipërisë

Pavarësisht qëndrimeve të ndryshme politike, një gjë bie në sy: protestat në Shqipëri nuk po diskutohen më vetëm brenda vendit. Falë videove të shpërndara në rrjetet sociale, ato kanë kaluar kufijtë dhe kanë hyrë në debatin ndërkombëtar, duke tërhequr vëmendjen e mediave të mëdha dhe të mijëra përdoruesve nga vende të ndryshme të botës.